«Արցախը ՀՀ-ին կապող միջանցքի հետ կապված պայմանավորվածությունը նոյեմբերի իննի փաստաթղթի մեջ է։ ՀՀ-ի եւ Ադրբեջանի ղեկավարները դա պայմանավորվել են ՌԴ-ի հետ։ Այլ բան է՝ ՌԴ-ն դա վա՞տ է իրականացնում, թե՞ լավ։ Սա բանակցությունների արդյունք պետք է լինի։ Լաչինի միջանցքի հարցով միջազգային դիտորդների անհրաժեշտություն, գտնում եմ, որ չկա»,-խորհրդարանում լրագրողների հետ ճեպազրույցում այսօր ասաց «Հայաստան» խմբակցության պատգամավոր, ՀՀ պաշտպանության նախկին նախարար Սեյրան Օհանյանը՝ անդրադառնալով ՀՀ ԱԳՆ-ի հայտարարությանը, որ Լաչինի միջանցք եւ ԼՂ միջազգային փաստահավաք խմբի գործուղումն անհրաժեշտություն է։
Հիշեցնենք, որ արցախաադրբեջանական շփման գծում մարտի 5-ին Ադրբեջանի հարձակողական եւ դիվերսիոն գործողությունների հետեւանքով զոհվել են ԱՀ ոստիկանության 3 եւ վիրավորվել՝ 1 աշխատակից։
Սեյրան Օհանյանը մոտեցումն այսպես բացատրեց․ «Մեզ պետք չեն մարդիկ, որոնք գրիչներով եւ հեռադիտակներով են գալու եւ դիտարկում անելու։ Տեղում դա իրականացնողը ՌԴ խաղաղապահ ուժերն են։ Մյուս կողմից, միջազգային հարթություններում Արցախի հարցի բարձրաձայնումն անհրաժեշտություն է, հակամարտությունը լուծված չէ, եւ լուծման տարբերակը պետք է վերադառնա ԵԱՀԿ ՄԽ համանախագահության տիրույթ»։
Հարավային Կովկասում ԵՄ հատուկ ներկայացուցիչ Տոյվո Կլաարն Ադրբեջանի դիվերսիոն հարձակումից հետո գրել էր, որ «տեղի ունեցած արյունալի միջադեպն ընդգծում է բանակցությունների առաջմղման խիստ անհրաժեշտությունը»։ Մեկնաբանելով այս պնդումը՝ Սեյրան Օհանյանը շեշտեց, որ բանակցությունների շարունակությունն անհրաժեշտություն է Արցախի անմիջական ներգրավմամբ․ «Բայց այն, որ խաղաղապահների ստորաբաժանումներն անմիջապես արձագանքել են, միանշանակ է»։
Կարդացեք նաև
Հարցին՝ ի՞նչ հիմքեր ունենք պնդելու, որ երեկվա կատարվածն ավելի մեծ էսկալացիայի կբերի, Սեյրան Օհանյանը պատասխանեց․ «Անվտանգության համար երաշխիքներ պետք է ձեւավորել։ Այսօրվա իշխանությունը խաղաղությունն է համարում երաշխիք, մինչդեռ խաղաղությունն անվտանգության համար հիմնարար արժեք է։ Անվտանգության ազգային արժեքը մեր բանակն է։ Ընդ որում, Արցախի դեպքում մենք միջազգային հանրությանը պետք է կարողանանք ներկայացնել Արցախի պաշտպանության բանակի անհրաժեշտությունը։ Այն հակամարտության սկզբնական փուլում ձեւավորվել է՝ ապահովելու Արցախի անվտանգությունը, ինքնապաշտպանությունը։ Անգամ եթե այսօր Ադրբեջանը խոսում է զինամթերք տեղափոխելու մասին, ապա ինչպե՞ս կարելի է այդ երկրի ներկայիս սադրանքների ընթացքում զենք չկիրառել եւ չինքնապաշտպանվել։ Ուստի ՊԲ-ն անհրաժեշտություն է։ Արցախում կան հայկական ուժեր, բայց ոչ՝ հայաստանյան։ Սա կարեւոր է փաստել։ Իսկ միջազգային երաշխիքը բանակցային գործընթացն է՝ դիվանագիտությունը։ Չկա դիվանագիտություն, սկսվում է պատերազմ։ Մինչեւ 2018թ․-ը ազգային եւ միջազգային մեխանիզմները մեկը մյուսին լրացնելով՝ կարողացել են Արցախի հիմնախնդիրն առաջ մղել, ինչն այսօր չենք տեսնում»։
Սեյրան Օհանյանը հավելեց, որ մարտական գործողություններ թե Արցախի, թե ՀՀ-ի սահմաններին ցանկացած պահի հնարավոր են։
Լուիզա ՍՈՒՔԻԱՍՅԱՆ
