ԱՄՆ-ը պատրաստ է շարունակել աջակցել Ադրբեջանին և Հայաստանին՝ խաղաղության պայմանագրի ստորագրման գործում: Այս մասին լրագրողներին ասել է ԱՄՆ պետքարտուղարության՝ Հարավային Կովկասի հարցերով հատուկ ներկայացուցիչ Լուիս Բոնոն, որը տարածաշրջանային այցով գտնվում է Բաքվում:
«Խաղաղության պայմանագիրը պետք է լինի կայուն: Եվ այն պետք է գա հենց կողմերից, ոչ թե ԱՄՆ-ից կամ այլ երկրներից»,- ասել է Բոնոն:
Նրա խոսքով՝ Վաշինգտոնի համար կարևոր է, որ Ադրբեջանն ու Հայաստանը կապի մեջ լինեն՝ անկախ միջնորդության ձևաչափից:
«Մեր վերջնանպատակը Ադրբեջանի և Հայաստանի միջև խաղաղության հասնելն է: Խաղաղությունը շահավետ է երկու կողմերի համար էլ: Մյունխենում տեղի ունեցած հանդիպմանը երկու կողմերն էլ հայտարարեցին, որ խաղաղություն են ուզում»,- ասել է Բոնոն:
Կարդացեք նաև
Նա հավելել է, որ վաղը այցելելու է Հայաստան: «[Տարածաշրջան] իմ այցի նպատակն է խրախուսել կողմերին երկխոսության ու նոր հանդիպում կազմակերպել»,- ասել է Բոնոն:
Պատրաստեց Վիկտորյա ԱՆԴՐԵԱՍՅԱՆԸ
