«Այդ եզրույթն Ադրբեջանի ԱԳ նախարարի կողմից ներկայացվեց որպես հետընթաց, որ գործընթացը դանդաղել է։ Բայց այստեղ էականը Ջեյհուն Բայրամովի մեկնաբանությունը չէ։ Էական է այն, որ առաջարկների փոխանակման փուլին հասնում են հիմնական կետերը քննարկելուց հետո»,-խորհրդարանում լրագրողների հետ ճեպազրույցում այսօր ասաց «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով Ադրբեջանի ԱԳ նախարարի հայտարարությանը, թե ՀՀ-ի հետ անցել են «առցանց դիվանագիտության»։
Հայկ Մամիջանյանը շարունակեց․ «Մինչդեռ հնարավոր չի ՀՀ-Ադրբեջան «խաղաղության պայմանագրի» տրամաբանությունը քննարկել առաջարկների փոխանակմամբ։ Հիմնական կետերի շուրջ են գալիս եզրակացության, հետո նոր «առցանց դիվանագիտությամբ» քննարկում դետալները։ Նշյալը եւս մեկ անգամ հաստատում է, որ բանակցային հիմնական տրամաբանությունն ու ճարտարապետությունն արդեն կառուցված է եւ ոտնահարում է Արցախի կարգավիճակը, ինքնորոշման իրավունքը։ Այն, ըստ մեր փաստերի, առաջին անգամ հանգեցնելու է Արցախի՝ Ադրբեջանի կազմում լինելուն»։
Լիլիթ Մինասյան
Ջեյհուն Բայրամովի հայտարարությանն անդրադարձավ նաեւ ՔՊ խմբակցության պատգամավոր Լիլիթ Մինասյանը՝ հղում անելով Նիկոլ Փաշինյանի երեկվա հայտարարությանը՝ խաղաղության պայմանագրի փուլերի մասին։ Ըստ Լիլիթ Մինասյանի՝ գործընթացը ոչ միայն թղթային է, այլեւ առցանց․ «Ի՞նչ է տալու մեզ խաղաղության պայմանագիրը։ Բոլորս համոզված ենք, որ մեզ անհրաժեշտ է խաղաղության եւ ոչինչ դրանից բացի»։
Լրագրողի նկատառումը, որ ըստ Բայրամովի՝ «առցանց դիվանագիտությունը» հետընթաց է, մնաց անպատասխան, քանի որ հարցի իրավունքը փոխանցվեց հաջորդ լրագրողին։
Կարդացեք նաև
Լուիզա ՍՈՒՔԻԱՍՅԱՆ
