«Բայց այս ընթացքում եղե՞լ է դեպք, որ ՀՀ -ի եւ Արցախի իշխանությունները որեւէ զիջման չհամաձայնեն։ Նոյեմբերի 9-ի փաստաթղթում գրված բոլոր հակահայ կետերը Փաշինյանն ափալ-թափալ կատարեց։ Գերիների վերադարձի կետը մինչեւ հիմա կատարված չէ, իսկ Փաշինյանի բանավոր հրամանով զորքերը հետ քաշվեցին Սյունիքի սահման, ինչի հետեւանքով ունենք անվտանգային ահռելի խնդիրներ»,-խորհրդարանում լրագրողների հետ ճեպազրույցում այսօր ասաց «Պատիվ ունեմ» խմբակցության ղեկավար Հայկ Մամիջանյանը` անդրադառնալով տեղեկություններին, որ Լաչինի միջանցքում Ադրբեջանի պահանջով գուցե ռենտգեն սարք տեղադրվի` բեռնատար մեքենաների տեսահսկման համար։
«Չեմ ուզում դրա հետ կապված ասել ավելին, քան ասել են Արցախի իշխանությունները, բայց դա շատ վտանգավոր գործընթաց է, որովհետեւ Ադրբեջանը դա ներկայացնելու է այնպես, որպեսզի հետագայում հիմք լինի որոշակի այլ փոփոխությունների։ Իմ համար անընկալելի են ՀՀ-ի մոտեցումներն այս հարցում։ Կենցաղային օրինակ բերեմ։ Ես պայմանագրով ունեմ Տաթեւի անվտանգությունն ապահովելու պարտավորություն, ինչպես ՀՀ-ն ունի Արցախի հանդեպ։ Դուք, Հերմինե, հարձակվում եք Տաթեւի վրա։ Ես ցանկություն չեմ ունենում կամ չեմ կարողանում Տաթեւին պաշտպանել ու ասում եմ` դե Հերմինեն ու Տաթեւն իրար հետ իրենց հարցերը կլուծեն։ Այդպես չի կարելի, որովհետեւ ՀՀ-ն է Արցախի անվտանգության երաշխավորը եւ ավելի մեծ լծակներ ունի միջազգային կառույցներում` որպես ճանաչված, սուվերեն պետություն»:
Լուիզա ՍՈՒՔԻԱՍՅԱՆ
