Երևանի մանկական երկաթուղին կբարեկարգվի, կիրճում կտեղադրվի նաև ճոպանուղի։ Ի լրումն էկոնոմիկայի նախարար Վահան Քերոբյանի ներկայացրած «Արագած» ներդրումային ծրագրի, այսօր կառավարության նիստում հայտնեց Երևանի փոխքաղաքապետ Տիգրան Ավինյանը:
Երևանի փոխքաղաքապետը էկոնոմիկայի նախարար Վահան Քերոբյանից հետաքրքրվեց, թե որ փուլում է մանկական երկաթուղու ծրագիրը. «Ավարտական, կարելի է ասել։ Հիմա ամփոփում ենք, ձևավորում ենք ընդհանուր պատկերը, և շուտով այդ ծրագիրը ևս կներկայացնենք կառավարությանը»,– հայտնեց Վահան Քերոբյանը։
Տիգրան Ավինյանը հիշեցրեց, որ ներդրումային ծրագիրն առաջարկել էր նույն «ՌՈՒՑՈԳ-ԻՆՎԵՍՏ» ներդրումային-շինարարական հոլդինգի կազմում ընդգրկված «ՌԻԴ» ՍՊԸ-ն, որը հենց «Արագած» լեռնադահուկային և էկոգյուղատնտեսական նոր համալիրի ծրագրի հեղինակն է։
Նա նշեց, որ Երևանի քաղաքապետարանը ներդրող ընկերության հետ պայմանավորվածություն ունի, որ մանկական երկաթուղու արդիականացման ծրագիրն ամբողջությամբ պետք է իրականացնի ներդրողը, իսկ ճոպանուղու կառուցման համար կներդնի մինչև 20 մլն դոլար։
Կարդացեք նաև
«Եթե դրանից ավելի կլինի, ինչը քիչ հավանական է, միայն այդ դեպքում ենթակառուցվածքային աջակցության ծրագրով էկոնոմիկայի նախարարությունը կարող է միջամտել»,– ասաց Ավինյանը։
Նրա խոսքով՝ ծրագրի ընդհանուր արժեքը շուրջ 150 մլն դոլար է։
Լուսինե ՄԱՐԳԱՐՅԱՆ
