Վերջին տարում Հայաստանի տեխնոլոգիական ոլորտի լանդշաֆտը խիստ փոխվել է, քանի որ երկրում հայտնվել են առաջնակարգ ՏՏ ընկերություններ և տասնյակ հազարավոր երիտասարդ տաղանդավոր մարդիկ , որոնք աշխատելով Հայաստանում՝ ստեղծում են նորարարություններ, որը նպաստում է ոչ միայն ՏՏ ոլորտի այլ առհասարակ Հայաստանի տնտեսության առաջընթացին: Նման հայտարարություն արեց ՀՀ էկոնոմիկայի նախարար Վահան Քերոբյանն, այսօր «Ճանապարհ դեպի IT Հայաստանում 2023 թվականին» թվային կոնֆերանսին։
«Այսօր, և կառավարությունը, և էկոհասարակությունը ջանում են Երևանը դարձնել տարածաշրջանի տեխնոլոգիական կենտրոն՝ բարելավելով բոլոր անհրաժեշտ բաղադրիչները, որոնք ըստ էության հետ են մնում պահանջվող մակարդակից, ընդ որում մի քանի ուղղություններով, և օրենսդրական կարգավորումներն են, և գործարար միջավայրի բարելավումն է, ինչպես նաև այնպիսի կենցաղային հարցեր, ինչպիսիք են կացարանը, կոմերցիոն գույքը, երեխաների առողջապահության և կրթության հարցերը», -նշեց Քերոբյանը:
Պատասխանելով հարցին, թե ինչպե՛ս է Հայաստանի տնտեսության վրա ազդել այն հանգամանքը, որ Հայաստանը 2022 թվականին զբաղեցրել է 11-րդ տեղը Ֆրեյզերի ինստիտուտի՝ «Աշխարհի տնտեսական ազատությունը» զեկույցում՝ Քերոբյանն ասաց, որ վերջին տարիներին կառավարությունն ակտիվորեն բարեփոխումներ է իրականացնում, միաժամանակ, խոստովանեց, որ միշտ չէ, որ կարողանում են ցանկալի արդյունքի հասնել: Նա հավաստիացրեց, որ Հայաստանի տնտեսության ազատականացմանն ուղղված իրենց ջանքերն ու վճռականությունը շարունակվում է : Քերոբյանը նշեց, որ Հայաստանը տասնյակ ինդեքսներում, այդ թվում ՝ կոռուպցիայի դեմ պայքարի, խոսքի ազատության ուղղությամբ Հայաստանը բարելավել է իր դիրքերը: Նրա կարծիքով, տնտեսության ազատականացմանն ուղղված կառավարության ջանքերն ու նախորդ տարվա գրանցած աննախադեպ տնտեսական ակտիվությունն է հիմք ծառայել ռուս ռելոկանտների համար, որպեսզի նրանք Հայաստանն ընտրեն որպես իրենց համար «նոր տուն»:
Քերոբյանը համոզմունք հայտնեց, որ մինչև 2018 թվականի Հայաստանն ու ներկայիս Հայաստանը բոլորովին տարբեր, իրար հետ չհամեմատվող երկրներ են ու իր կարծիքով, այս վերջինը որակապես շահեկան է տնտեսության ազատականացման և բիզնես միջավայրի բարելավման առումով: Նա ասաց, որ թեպետ շատ գործեր են արվել, բայց բարելավելու ուղղությամբ դեռ անելիքներ կան: Իսկ ինչպիսի՞ անելիքներ կան՝ հարցին, Քերոբյանը պատասխանեց, որպեսզի Երևանը դառնա այնպիսի կենտրոն, որտեղից գլոբալ ընկերությունները կարողանան աշխատել ողջ աշխարհի համար բավականի դետալային աշխատանք է:
Կարդացեք նաև
Եռօրյա կոնֆերանսի ընթացքում բանախոսները կներկայացնեն Հայաստանի ՏՏ ոլորտում կարիերա կառուցելու, ստարտափ հիմնելու առանձնահատկությունները։
Լուսինե ՄԱՐԳԱՐՅԱՆ
