Դիլիջանի համայնքապետարանն այս տարի մոտ 2 միլիարդ դրամի սուբվենցիոն ծրագրի հայտ է ներկայացրել կառավարություն։ Այս մասին Aravot.am-ի հետ զրույցում նշեց Դիլիջանի համայնքապետ Դավիթ Սարգսյանը։
«Մենք մեր առջև խնդիր ենք դրել՝ կարճ ժամանակահատվածում Դիլիջանում մեծ փոփոխություններ առաջ բերել։ Արդեն միանգամից 12 սուբվենցիոն ծրագրի հայտ ենք ներկայացրել և ամբողջ ծրագրի 48 %-ը և ավելին իրականացնելու ենք համայնքի բյուջեի միջոցներով: Այս փուլում մեզ համար կարևոր են անվտանգ ու հարմարավետ փողոցներ, մայթեր, կանգառներ, շենքեր, բակեր ունենալ, ինչպես նաև լուծել գյուղական բնակավայրերում ջրագծերի, երկրորդային ու երրորդային նշանակության ճանապարհների բարեկարգման խնդիրը: Շատ լավ գիտակցում ենք, որ եթե մարդու առաջին անհրաժեշտության կարիքները բավարարված չեն, նրան ոչ մի գունեղ միջոցառում ու դասընթաց չի հետաքրքրելու. այդ իսկ պատճառով մենք շարժվում ենք մեր առջև դրված օրակարգով ու հնարավորինս թեթևացնում դիլիջանցիների հոգսը: Համոզված եմ՝ նման արագությամբ ու արդյունավետությամբ աշխատանքի դեպքում կարճ ժամանակահատվածում կունենանք նկատելի արդյունք»,-նշեց Սարգսյանը։
Հավելենք, որ սուբվենցիոն ծրագրերի հիմնական մասը բաժին է ընկնում ճանապարհաշինության ոլորտին։
Լիա ՃԱՂԱՐՅԱՆ
Կարդացեք նաև
Լուսանկարը՝ Դիլիջանի համայնքապետարանի ֆեյսբուքյան էջից
