Ուկրաինայի տարածքում ռազմական գործողությունները սկսվել են 2022 թվականի փետրվարի 24-ին։ Դրան նախորդել է ռուսական զորքերի կենտրոնացումը ուկրաինական սահմանի մոտ, ինչպես նաև ճգնաժամը՝ Ռուսաստանի և Ուկրաինայի հարաբերություններում։
Անցել է մեկ տարի, իսկ պատերազմը կարող է շարունակվել դեռ ամիսներ, նույնիսկ տարիներ, քանի որ կողմերը չեն ցանկանում հետքայլ անել:
Ռուսաստանի նախագահ Վլադիմիր Պուտինը կարծում է, որ կարող է հաջողության հասնել՝ ցուցաբերելով ռազմավարական տոկունություն և խաղադրույքը դնելով այն հանգամանքի վրա, որ Արևմուտքը կհոգնի Ուկրաինային օգնելուց և կկենտրոնանա սեփական տնտեսության, ինչպես նաև Չինաստանի կողմից եկող սպառնալիքի վրա։
Արևմուտքն, այնուամենայնիվ, վճռական է և շարունակում է զենք մատակարարել Ուկրաինային։ Ռազմաճակատում առայժմ շփման գծի լուրջ, պատերազմի ելքը որոշող փոփոխություններ չեն նկատվում:
Կարդացեք նաև
Այս արդյունքները չեն կարող բավարարել կողմերից և ոչ մեկին։ Ռուսաստանն առայսօր չկարողացավ ամբողջությամբ իր վերահսկողության տակ առնել ուկրաինական այն շրջանները, որոնց նկատմամբ հավակնություններ ունի, իսկ Կիևը չի կարողացել ազատել իր տարածքը ռուսաստանյան զորքերից:
Հասկանալի է, երկու երկրները վաղ թե ուշ կնստեն բանակցությունների սեղանի շուրջ։ Դա տեղի կունենա այն ժամանակ, երբ կողմերը վստահ կլինեն, որ ռազմական ճանապարհով այլեւս ոչ մի խնդիր չեն կարող լուծել:
Սակայն, ինչպես արդեն ասվեց, ռազմական գործողությունների ավարտին կարելի է դեռ շատ երկար սպասել։ Պատճառներից մեկը նաև այն է, որ Կիևը չի վստահում Մոսկվային. բանակցությունների մասին ցանկացած առաջարկ դիտարկվում է որպես ժամանակավոր դադար՝ ուժերը հավաքելու և նոր հարձակման նախապատրաստվելու համար։ Այնպես որ, զինադադարը (եթե անգամ կնքվի) կարող է երկար չտևել, և ռազմական գործողությունները կարող են վերսկսվել նոր թափով ։
Այսօր, հետևելով Ուկրաինայի և Ռուսաստանի հարաբերություններին, կարելի է վստահ արձանագրել՝ պատերազմի ապագան ամենևին էլ կանխորոշված չէ:
Անաստասիա Գրիգորյան
ՀՌՀ, մագիստրատուրա, 1-ին կուրս
