«Ես նման մարդկանց չեմ մեկնաբանում: Ներողություն, բայց մարդու անուն եք տալիս, որին բացի ձեզնից եւ մի քանի հոգի իր մտերիմներից, ոչ ոք լուրջ չի վերաբերվում»,- այսպիսի պատասխան տվեց այսօր խորհրդարանում ԱԺ նախագահ Ալեն Սիմոնյանը՝ պատասխանելով լրագրողի հարցին՝ ՀՀԿ փոխնախագահ Արմեն Աշոտյանի՝ ՀՀ-Ադրբեջան խաղաղության պայմանագրի վերաբերյալ հրապարակած փաստաթղթի մասին հարցին, որում Արցախի եւ արցախահայերի ճակատագիրը որոշում է Ադրբեջանի Սահմանադրության համաձայն:
Մեկ այլ հարցի՝ տեղեկություններ են շրջանառվում, որ Բերձորի միջանցքը բացվելու է եւ սքանավորող անցակետեր են տեղադրվելու. համապատասխանո՞ւմ են դրանք իրականությանը, Ալեն Սիմոնյանը պատասխանեց, որ ինքն ուրախ է, որ Արցախի օրինական իշխանություններն են բանակցում եւ որոշումն իրենք են կայացնելու, ՀՀ իշխանությունը չի խառնվում այդ հարցերին: Ինքը նաեւ տեղեկություն չունի, թե Արցախից ովքե՞ր ու ի՞նչ են բանակցում Ադրբեջանի ներկայացուցիչների հետ:
Ռուբեն Վարդանյանի՝ Արցախի պետնախարարի պաշտոնից ազատվելու մասին Երեւանի դիրքորոշման մասին հարցի պատասխանն էլ եղավ. «Ինչպես նշանակման ժամանակ տեսակետ չուներ, այնպես էլ ազատման ժամանակ տեսակետ չունի»: Նա հստակեցրեց, որ Ռուբեն Վարդանյանի թե նշանակման, թե ազատման հարցերում Երեւանը դերակատարում եւ հետաքրքրություն չի ունեցել:
Ալեն Սիմոնյանը հայտարարեց նաեւ, որ ՀՀ-ի ու Ադրբեջանի միջեւ բանակցություններում առաջընթաց կա՝ արձագանքելով դիտարկմանը, որ խոսվում է բանակցությունների առցանց ռեժիմի անցնելու մասին, բայց դրանք չի կարող մանրամասնել-բացահայտել, միայն կարող է ասել, որ միջազգայնորեն ընդունված սկզբունքների վրա է ամեն ինչ ընթանում:
Կարդացեք նաև
«Մենք չենք կարող Խաղաղության համաձայնագրի մեջ ՀՀ-ի ինքնիշխանության, տարածքային ամբողջականության մասով ականներ դնել»,- ասաց Ալեն Սիմոնյանը՝ հստակեցնելով, որ իր պատկերացմամբ՝ Արցախի հարցը չի կարող տեղ ունենալ ՀՀ-Ադրբեջան հարաբերությունների հստակեցման մեջ: Միաժամանակ, նա չի ցանկանում, որ տպավորություն ստեղծվի, թե Հայաստանը հրաժարվում է Արցախի ժողովրդի ճակատագրից:
Հայաստան-Թուրքիա հարաբերությունների մասով էլ, նա կարծում է, որ 30 տարվա ընթացքում առաջին անգամ շատ մոտ ենք կանգնած հարաբերությունների կարգավորմանը, թե ի՞նչ կստացվի՝ ժամանակը ցույց կտա:
Այլ մանրամասները՝ տեսանյութում
Նելլի ԳՐԻԳՈՐՅԱՆ
