Երևանի թատրոնի և կինոյի պետական ինստիտուտի մագիստրատուրայի ուսանողուհի, երիտասարդ կինոռեժիսոր Մարիամ Եգորյանի «Շուշի. ԱՄԷՆ» փաստագրական ֆիլմը Սրետենսկու ուղղափառ «Встреча» միջազգային կինոփառատոնի շրջանակում արժանացել է «Լավագույն օտարերկրյա ֆիլմ» անվանակարգին։ Նույն ֆիլմը նաև արժանացել է Եվրասիական հեռուստառադիո ակադեմիայի հատուկ մրցանակի:
Ֆիլմի ռեժիսոր Մարիամ Եգորյանը մեզ հետ զրույցում նշեց, որ «Շուշի. ԱՄԷՆ» ֆիլմի դեպքում շատ կարևոր են միջազգային կինոփառատոների մասնակցությունը, քանի որ այն իր մեջ կարևոր ուղերձներ ունի ուղղված ամբողջ աշխարհին:
«Երբ մրցանակաբաշխության ժամանակ հնչեց ֆիլմի անունը, շատ ուրախացա։ Ինչ-որ տեղ սպասելի էր, որովհետև ֆիլմի ցուցադրությունից հետո, բոլորը շատ ջերմ ընդունեցին, իսկ երկրորդ անգամ կրկին լսել անունը և բեմ հրավիրվել` պատկերացնել անգամ չէի կարող։ Իրոք, հրաշալի զգացողություն էր: Հուզիչ պահ էր, նաև այն իմաստով, որ մրցանակները նվիրեցի վարպետիս՝ Ռուբեն Գրիգորյանին, ով նախագծի մտահղացման հեղինակն է և համառեժիսորը»,-եզրափակեց Մարիամ Եգորյանը։
Նշենք, որ «Շուշի. ԱՄԷՆ» փաստագրական ֆիլմը ռեժիսոր Ռուբեն Գրիգորյանի «Հայոց Արեւելից կողմերի պատմություն. Արցախ» ֆիլմաշարի վեցերորդ ֆիլմն է, որը վարպետի մահվանից հետո ավարտին է հասցրել նրա արհեստանոցի ուսանողուհի Մարիամ Եգորյանը:
Վովա ԱՐԶՈՒՄԱՆՅԱՆ
