«Շատ լավ տարբերակ է ընտրել կառավարությունը, որ աշխատավարձի բարձրացումը կապում է պրոֆեսիոնալիզմի հետ, բայց ուժային մարմինների հետ կապված մտահոգություն կա։ ԱԱԾ աշխատանքի հիմնական մասն օպերատիվ բլոկում է։ Նրանց աշխատանքը սկսվում է ինչ-որ ժամի, եւ որեւէ մեկը չի իմանում, թե երբ է այն ավարտվում»,-ԱԺ պաշտպանության եւ անվտանգության հարցերի հանձնաժողովի այսօրվա նիստում հայտարարեց հանձնաժողովի փոխնախագահ, ՔՊ խմբակցության պատգամավոր Արմեն Խաչատրյանը։
Հիշեցնենք, որ հանձնաժողովում այսօր քննարկվել է կառավարության հեղինակած՝ «Պետական պաշտոններ եւ պետական ծառայության պաշտոններ զբաղեցնող անձանց վարձատրության մասին» օրենքում լրացումներ եւ փոփոխություն կատարելու մասին նախագիծը, ըստ որի՝ 2 անգամ ատեստավորում չանցած ԱԱԾ ծառայողին կառաջարկվի այլ պաշտոն, որից հրաժարվելու դեպքում աշխատակիցը կարձակվի ծառայությունից։
Արմեն Խաչատրյանը շարունակեց․ «Մտավախությունս այն է, որ օպերատիվ մասի այն աշխատողները, որոնք ունեն բարձր արդյունավետություն եւ պրոֆեսիոնալիզմ, խնդիրների առաջ կկանգնեն ատեստավորման ընթացքում։ Այսինքն, այն ստորաբաժանումները, որոնց աշխատանքը սկսվում է 9-ին եւ վերջանում 18:00-ին, կարող են ավելի լավ պատրաստվել ատեստավորման թեստերին։ Թող չնեղանան, բայց նրանք ավելի շատ ժամանակ ունեն պատրաստվելու, եւ նրանց աշխատանքը չես համեմատի օպերատիվ բլոկի աշխատողների գործի հետ։ Հիմա այն օպերը, որն առավոտ տանից դուրս է գալիս ու վերադառնում, ասենք, հաջորդ օրը, իրենից պահանջվելու են մասնագիտական գիտելիքներ եւ այլն։ Ուստի առաջարկում եմ ատեստավորման կարգը եւ թեստերը քննարկել մեր հանձնաժողովում, հետո նոր ներկայացնել կառավարությանը»։
Կարդացեք նաև
Ըստ Արմեն Խաչատրյանի՝ պետք է հաշի առնել, որ բարձր արդյունավետություն ունեցող ծառայողը կարող է որեւէ հանձնարարական չկատարել ու դրա պատճառով պաշտոնազրկվել, ինչն անթույլատրելի է։
Լուիզա ՍՈՒՔԻԱՍՅԱՆ
