ԱԺ պաշտպանության եւ անվտանգության հարցերի հանձնաժողովն այսօր դրական եզրակացություն տվեց «ՀՀ կառավարության եւ ՌԴ կառավարության միջեւ տեղեկատվական անվտանգության ապահովման բնագավառում համագործակցության մասին» համաձայնագիրը վավերացնելու մասին հարցին։ Այն շուտով կներառվի ԱԺ լիագումար նիստերի օրակարգում։
«Նպատակը տեղեկատվական անվտանգության ոլորտում համագործակցության խթանումն է։ Կիրարկմամբ նախատեսվում է նպաստել նաեւ սպառնալիքների վերաբերյալ տեղեկատվության փոխանակումը եւ համատեղ դիմակայմանը»,-հայտարարեց նախագծի զեկուցող, ՀՀ բարձր տեխնոլոգիական արդյունաբերության նախարարի առաջին տեղակալ Գեւորգ Մանթաշյանը։
Գեւորգ Մանթաշյան
Համաձայնագրով սահմանվում են տեղեկատվական անվտանգության ոլորտի ուղղությունները՝ սպառնալիքների հակազդեցություն, փորձի փոխանակում, ահաբեկչական կամ այլ հանցավոր նպատակներով տեղեկատվական տեխնոլոգիաների օգտագործմամբ հանցագործությունների բացահայտում, կանխում եւ հետաքննում։
Կարդացեք նաև
ՔՊ խմբակցության պատգամավոր Վիլեն Գաբրիելյանը հետաքրքրվեց․ «Փետրվարի 16-ին ՌԴ պետդումայում ընդունվել է օրենք, որը ԵԽ կանոնադրության եւ 21 միջազգային կոնվենցիաների դենոնսացիայի (պետության կողմից որևէ գործողություն դադարեցնելու կամ համաձայնագրից հրաժարվելու հայտարարություն.-հեղինակ) մասին է։ Ստացվում է, որ մենք հիմա պետք է հաստատենք մի համաձայնագիր, որը կարգավորվում է նաեւ միջազգային կոնվենցիաներով, բայց կողմերից մեկը՝ ՌԴ-ն, փաստացի դենոնսացիայի է ենթարկել տվյալ կոնվենցիաները։ Տրամաբանակա՞ն, է, որ մենք կողմ լինենք, իսկ ՌԴ-ն՝ դեմ»։
«Սա զուտ երկու երկրների միջեւ տեղեկատվական անվտանգության ապահովման մասին է, եւ կապ չունի ձեր նշածի հետ։ Երկու երկրների անվտանգության խորհուրդները համաձայն են, ընթացակարգերը պահպանված են»,-պատասխանեց Մանթաշյանը։
Վիլեն Գաբրիելյանը համաձայնագրից կետեր մեջբերեց ու պնդեց, որ խոսքը հենց այն մասին է, ինչ ինքը նկատի ուներ, որովհետեւ համաձայնագիրը հղում է անում մի շարք միջազգային կոնվենցիաներին։ Փոխնախարարն ի պատասխան բացատրեց, որ իրենց դիրքորոշումը չի հակասում դրան։
Մանրամասն քիչ ուշ՝ տեսանյութում։
Լուիզա ՍՈՒՔԻԱՍՅԱՆ
