Այսօր, ինչպես տեղեկացրել ենք, «Միասին» այլընտրանքային հասարակական-քաղաքական շարժման անդամները ԱԺ խմբակցություններին փոխանցեցին նախապես ընդունված Արցախյան ազգային ազատագրական պայքարի 35-ամյակին նվիրված «Արցախի Հանրապետության ճանաչում՝ հանուն փրկության» համահավաքի բանաձեւը:
Aravot.am-ի հետ զրույցում անդրադառնալով Արցախի նախագահ Արայիկ Հարությունյանի՝ պետնախարարի պաշտոնից Ռուբեն Վարդանյանին ազատելու որոշմանը՝ շարժման անդամ Նարինե Դիլբարյանն ասաց. «Ես արձանագրել եմ, որ Արայիկ Հարությունյանը հերթական անգամ կատարում է Ալիեւի կամքը եւ ստորագրում է հերթական կապիտուլյացիան, ստանձնում Ալիեւի ցեղասպանական բոլոր գործողությունների պատասխանատվությունը: Ես հիշեցնեմ, որ մինչեւ նոյեմբերի 9-ը, երբ Շուշին ընկել էր, Արայիկ Հարությունյանի հրահանգով կատարվում էր Արցախի բնակչության տարհանում եւ Քարվաճառի ճանապարհով տասնյակ հազարավոր ընտանիքներ Արայիկ Հարությունյանի դրդմամբ գալիս էին Հայաստան, այսինքն, դատարկում էին Արցախը: Սա երկրորդ փորձն է մերժելու այն ճանապարհը, որով եկել էր Ռուբեն Վարդանյանը: Մենք ոչ թե պաշտպանում ենք Ռուբեն Վարդանյան անձին, այլ այն ճանապարհը, որն ինքը բերում է՝ ապրելու կողք կողքի, բայց ոչ թե միասին:
Կարդացեք նաև
Իսկ Արայիկ Հարությունյանը, փաստորեն, օգտվելով նրանից, որ արցախյան բոլոր իշխանությունները, նաեւ խորհրդարանը, որտեղ ինքը մեծամասնություն ունի, ենթարկվում է իրեն, նախ փորձում էր ճնշել Ռուբեն Վարդանյանին, որ ստորագրի հրաժարական, չհասավ դրան, իսկ հիմա արտաքին ճնշման տակ թաքնվելով՝ բերում է կեղծ նարատիվ, թե մեզ պարտադրում են, դա ստիպյալ է եւ ինքը ցավով է կատարում: Ո՛չ, ինքը կատարում է Ալիեւի կամքը: Եվ միակ մեղավորը Նիկոլ Փաշինյանը չէ, դա նիկոլականությունն է, այն հանձնվող կապիտուլյանտությունը: Բացի Նիկոլ Փաշինյանից, մենք պետք է կարողանաք ընդհանրապես ձերբազատվել այդ գաղափարաբանությունից եւ այդ համակարգի գործիչներից: Այսինքն, մեր պայքարը չի կարող լինել մերժել մեկ անձի: Այդ անձերը, ինչպես տեսնում ենք, կան եւ Արցախում:
Մենք բոլորս ասում էինք Արցախը ամուր է եւ պայքարում է… մենք գիտենք, որ իրական Արցախը ամուր է, բայց այնտեղ գտնվում են մարդիկ, որոնք կատարում են Ալիեւի կամքը եւ ստորագրում են հերթական կապիտուլյացիաները: Այս պարագայում գնալ բանակցությունների Ադրբեջանի հետ՝ նշանակում է կրկնել Նախիջեւանի ծրագիրը, ընդունել այն բացարձակ անհիմն թեզը, որ Արցախը դուրս գալով՝ խախտել է Ադրբեջանի տարածքային ամբողջականությունը: Իրականում Արցախը չի խախտել, այլ ինքնորոշվել է: Ըստ էության, ինքը երբեք չի գտնվել Ադրբեջանի անկախ Հանրապետության կազմում: Մեր պայքարի նպատակը հիմնական հենց դա է»:
Հռիփսիմե ՋԵԲԵՋՅԱՆ
