«Ռուբեն Վարդանյանը որոշել էր պայքարել մինչեւ վերջ՝ մինչեւ Արցախի անկախություն, եւ նրան հեռացրին Ադրբեջանի պահանջով։ Դա անողները, նշանակում է, գնալու են զիջումների։ Կարգավիճակն Ադրբեջանը թույլ չի տա, հետեւաբար՝ հայերին վերաբերվելու են որպես փոքրամասնություն։ Մի բռնապետի պարագայում, որն ատում է հայերին։
Նա հնարավորությունը բաց չի թողնի հարցը լուծել այնպես, ինչպես Թուրքիան լուծեց արեւմտահայության հարցը»,-«Արցախի հանրապետության միջազգային ճանաչման հրամայականը» խորագրով գիտագործնական համաժողովի ժամանակ այսօր լրագրողների հետ ճեպազրույցում ասաց քաղաքագետ Արթուր Խաչիկյանը։
Կարդացեք նաև
Նրա խոսքով՝ եթե Ադրբեջանին հաջողվի վերահսկողություն հաստատել Արցախում, ապա կփոխվի Արցախի ժողովրդագրական պատկերը․ «Հայերի մի մասը կտեղահանվի, մի մասը հնարավոր է ցեղասպանվի։ Մի մասը կարող է մնալ, որին լավագույն դեպքում իրավունք կտրվի հայերեն խոսելու։ Անվտանգության երաշխիքները, որոնք խոստանում է արեւմուտքը, սա են նշանակում։ Զարմանում եմ, որ այստեղ դեռ հարցեր են մնում»։
Անդրադառնալով ռուս-ուկրաինական ռազմական գործողություններին՝ Արթուր Խաչիկյանը նշեց, որ ապագայում մեծ էսկալացիա է սպասվում, որը կանդրադառնա նաեւ մեր վրա եւ կնպաստի ՌԴ-ի՝ տարածաշրջանից դուրսմղմանը։
Լուիզա ՍՈՒՔԻԱՍՅԱՆ
