«Անհանգստացնող միտում կա․ խնդիրը Ռուբեն Վարդանյանը չէ, խնդիրն Արայիկ Հարությունյանը չէ, այլ այն մթնոլորտը, որը կա պաշտոնական Ստեփանակերտում եւ Երեւանում։ Գործընթացը ստվերային է։ Կամ Ադրբեջանից ենք հաճախ մի բան իմանում, կամ միջազգային գործիչներից։ Ես այս գործընթացի մաս եմ համարում այդ պաշտոնանկությունը»,- «Արցախի հանրապետության միջազգային ճանաչման հրամայականը» խորագրով գիտագործնական համաժողովի ժամանակ այսօր լրագրողների հետ ճեպազրույցում ասաց «Այլընտրանքային նախագծեր խումբ» հասարակական կառույցի ղեկավար, ԱԺ նախկին պատգամավոր Վահե Հովհաննիսյանը։
Նրա խոսքով՝ Արցախի հարցում պաշտոնական Երեւանի դիրքորոշումն այն է, որ զիջենք մեր մի մասը, որ մյուս մասն ավելի կուշտ ապրի․ «Կամ համաձայն ենք բոլոր զիջումներին՝ կայունություն ստանալու համար։ Չի լինելու նման բան։ Մյուս դիրքորոշումն ընդգծված հակառուսականությունն է, որը չի արտահայտվում վիրավորանքներով, բայց համառորեն վեր է հանվում արեւմտյան հարթակներում։ Այս երկուսի արդյունքում մենք համաձայնում ենք զիջումներին՝ տեսական խաղաղության համար։ Իրականում մեզ պետք է խաղաղություն ոչ թե ՀՀ-ի հաշվին, այլ ՀՀ-ի համար։ Ցավոք, այս գաղափարի կրողները ՀՀ-ում դեռ չեն բյուրեղացել»։
Վահե Հովհաննիսյանի բնորոշմամբ՝ այսօրվա իրականությունն ամրագրված է նոյեմբերի 9-ի փաստաթղթով, սակայն ՀՀ իշխանության ջանքերով այդ փաստաթղթի ապագան քննարկվում է ոչ թե Ռուսաստանի հետ, որը հեղինակներից է այդ փաստաթղթի, այլ ուրիշ հարթակներում․ «Մեր ճակատագիրը որոշում է մեկ հոգի՝ ստվերային վիճակում»։
Կարդացեք նաև
Լուիզա ՍՈՒՔԻԱՍՅԱՆ
