«Ինձ համար ցնցող եւ զարհուրելի էր, որ Սամվել Բաբայանը, որին ժամանակին Արցախում «կոմանդույուշչի» էին հորջորջում, մարդ, որ մասնակցել է Արցախյան առաջին հաղթական պատերազմին, իրեն համարել է զորահրամանատար ու մեծագույն հայրենասեր, այժմ ինչպիսի պարույրներով է անցնում դանթեական դժոխքի եւ մտքի ինչպիսի զարհուրելի խավարումներ կարող է ունենալ »,- «Հայելի» ակումբում նշեց լեզվաբան Նարինե Դիլբարյանը՝ անդրադառնալով Սամվել Բաբայանի հարցազրույցին։
«Այս ամբողջ բանավեճն այն էր, որ Արայիկ Հարությունյանը որոշել է վերստին Սահմանադրական բարեփոխումներ անել, սակայն իրականում բարեփոխումների անվան ներքո նոր ճանապարհ բացել Ռուբեն Վարդանյանի հեռացման։ Եվ ահա Սամվել Բաբայանը Արցախի հեռուստատեսությանը տված հարցազրույցում խոսում է Արցախ-Ադրբեջան բանակցություններից՝ շրիշակից ցածր նշաձողի պայմաններում։ Նա ասում է, որ ունի ծրագիր՝ փոխհամաձայնության հանձնաժողով կազմելու եւ ադրբեջանցիների վերաբերյալ էլ հայտարարում, թե ձգձգումը նրանց օգտին չէ։
Փաստորեն, Սամվել Բաբայանը ադրբեջանցներին տեղեկացնում էր, որ ձգձգումը բացասական է, քանզի այդ ընթացքում Ռուսաստանը կարող է ուժեղանալ եւ Ադրբեջանին դարձնել վասալ։ Ու ինքը համոզված էր, որ Ադրբեջանը չի ուզում լինել Ռուսաստանի վասալ, ուստի պետք է բանակցությունների գա՝ իր նշած այդ հանձնաժողովով ու իր ձգտումներով»,-նշեց Նարինե Դիլբարյանը։
Լեզվաբանի ձեւակերպմամբ, առավել ահազարհուր, բացարձակ տրամաբանություն չունեցող եւ հակազգային միտք ինքը վերջին շրջանում չէր լսել․ «Ինձ համար նաեւ սարսափելի էր, որ Սամվել Բաբայանը, որ Արցախում ունի կուսակցություն, պատգամավորներ, ու այդ ամենով հանդերձ՝ կարող է իջնել գիտակցական մթագնման այդպիսի մակարդակի, որ ադրբեջանցիներին զգուշացնի՝ արագ եկեք բանակցեք։
Կարդացեք նաև
Բայց ինչի՞ մասին պետք է ոչ վասալ Ադրբեջանը բանակցի Սամվել Բաբայանի հետ։ Այն Ադրբեջանը, որ հայտարարում է, թե Լեռնային Ղարաբաղ գոյություն չունի, որ ինքը լուծել է Լեռնային Ղարաբաղի հարցը, կա բացարձակ Ադրբեջան․․․Բանակցի այն Ալիեւի եւ այն Ադրբեջանի հետ, որը նշում է, թե ով համաձայն չէ ընդունել իր քաղաքացիությունը եւ ապրել իր օրենքներով, ազատ է, կարող է հեռանալ, այսինքն` ոչ մի ազգային ինքնորոշում եւ ազգային հատկանիշ, բոլորդ ադրբեջանցի եք, իրենք մեզ հաղթել են, մենք կապիտուլյացիա ենք ստորագրել, մենք կապիտուլյանտներ ենք։ Սամվել Բաբայանը, փաստորեն, վասալի կարգավիճակո՞վ է պատրաստվում բանակցել Ադրբեջանի հետ»։
Գոհար ՀԱԿՈԲՅԱՆ
