«Մյունխենը շատ ծանր տպավորություն թողեց։ Այդ առիթով հիշեցնեմ բոլշեւիկների առաջնորդ Լենինի խոսքը՝ վերջապես հեղափոխությունն իրականություն դարձավ։ Մակրոնը մեզ ավետեց, թե իրականում ինչի համար էր 2018թ․ հայկական հեղափոխությունը, որը փաստորեն, ոչ թե թավշյա էր, այլ սողացող հեղափոխություն։ Դրա նպատակը Ռուսաստանի սահմանները Կովկասով փակելը, Ռուսաստանին այստեղից հանելն էր»,- «Հայելի» ակումբում նշեց ռեժիսոր Հովհաննես Գալստյանը։
Նրա խոսքով՝ «Մակրոնը հայտարարեց, որ սրանից հետո Հայաստանը Ռուսաստանի մուտքը Կովկաս փակելու դերակատարում է ունենալու, դառնալու է Ռուսաստանի կայսերապաշտական նկրտումները դեպի Կովկաս փակելու միջոց։ Ու այս ֆոնին՝ մեկ էլ մեր արեւմտամետները սկսեցին ոգեւորվել, թե Մակրոնն ասել է՝ Հայաստանը պետք է դառնա բուֆեր։ Հայաստանի ողբերգությունն այն է, որ մեր քաղաքական էլիտայի մեջ չափազանց շատ է գործակալական ցանցը, եւ արեւմտյան, եւ ռուսական գործակալական ցանցը։ Վերջինս նույն կերպ հայտարարում է, որ Հայաստանը Ռուսաստանի ֆորպոստն է։ Հիմա էլ սրանք են եկել, ասում են՝ Հայաստանը բուֆեր է։ Բուֆերն էլ, ֆորպոստն էլ դուք եք։ Ֆորպոստն էլ, բուֆերն էլ ձեր հայրական տունն է․․․»։
Ռեժիսորն ընդգծում է․ «Հայաստանը Հայաստանի Հանրապետությունն է, որին ոչ պետք է Ռուսաստանի դեմ բուֆեր լինել, որի հետ ռազմավարական դաշնակցի հարաբերություններ ունի, ոչ էլ՝ Ռուսաստանի ֆորպոստ․․․Հիմա այս հեղափոխության իմաստը այլեւս հասկանալի դարձավ՝ ինչու է սողացող ու այսքան երկար։ Հարցն այն է, որ բոլորն ունեն իրենց հետաքրքրությունները այդ հեղափոխության մեջ, բացի Հայաստանի Հանրապետությունից։ Իսկ Հայաստանի Հանրապետությունը ունի մեկ կարմիր գիծ․ դա իշխանության մնալն է եւ վերջ։
Ադրբեջանն ասում է՝ իմ տարածքային ամբողջականությունը չի քննարկվում ու ամեն օր քարտեզներ է հրապարակում, որտեղ արդեն Սյունիքն էլ է իրենցը, մնացածն էլ վիճելի տարածքներ են․․․Դա իր կարմիր գիծն է։ Թուրքիայի կարմիր գիծն այն է, որ պետք է ցեղասպանությունը մոռանա, իսկ սրանց կարմիր գիծը սա է՝ մնում ենք իշխանության ու այս ամեն ինչի տակ ստորագրում ենք»։
Կարդացեք նաև
Գոհար ՀԱԿՈԲՅԱՆ
