«Մութ է մնում հարցը, թե Սամվել Բաբայանն այսօր ինչ է անում եւ ինչ հավակնություններ ունի Արցախում։ Ի վերջո, նա ունեցել է բավականին մեծ դեր առաջին պատերազմի ժամանակ, բայց դրանից հետո իր գործունեությունն Արցախում այլ ուղղությամբ է գնացել»,-խորհրդարանում լրագրողների հետ ճեպազրույցում այսօր, անդրադառնալով հարցին, թե ի՞նչ եք կարծում՝ Արցախի ՊԲ նախկին հրամանատար, Արցախի ԱԽ նախկին քարտուղար Սամվել Բաբայանն ինչ որ հավակնություններ ունի՞, որ հայտարարում է, թե Արցախը պետք է ուղիղ բանակցություններով խնդիրները լուծի Ադրբեջանի հետ, ասաց ԱԺ «Հայաստան» խմբակցության պատգամավոր Աղվան Վարդանյանը։
Նա նշեց․ «Հիմա Արցախում սահմանադրական փոփոխություններ են սպասվում, որպեսզի ԱԺ-ն արտակարգ իրավիճակներում կարողանա նախագահ ընտրել։ Սամվել Բաբայանն Արցախի խորհրդարանում խմբակցություն ունի։ Արդյո՞ք Բաբայանի ներկայությունն Արայիկ Հարությունյանի հետ միասին այդ քվեարկությունն ապահովելու համար է։ Նրա ներկայությունը միայն անձնակա՞ն է, թե աշխարհաքաղաքական տարբեր կենտրոններից պայմանավորվածություններ կան։ Փակագծեր չեմ ուզում բացել»։
Դառնալով պնդմանը, որ ըստ Սամվել Բաբայանի՝ պետք է Արցախն առանձին երկխոսի Ադրբեջանի հետ, Աղվան Վարդանյանը նկատեց․ «Եթե չեմ սխալվում, նա ասել է՝ թող Ադրբեջանն առաջարկի Արցախից ում հետ է ուզում բանակցել։ Սա սխալ մոտեցում է։ Արցախն է որոշում, ոչ թե Ադրբեջանը։ ՀՀ իշխանությունն ասում է, որ ինքը չի խառնվում, թող Արցախն Ադրբեջանի հետ խոսի, եւ սա բերում է նույն խնդրին։ Խնդիրը ՀՀ իշխանությունն է, որը հասցրել է այս վիճակին։ Արցախի իրավիճակի պատճառը ՀՀ իշխանությունն է»։
Կարդացեք նաև
Հիշեցնենք՝ Սամվել Բաբայանը հայտարարել է, որ չի հավակնում Արցախի նախագահի պաշտոնին։
Լուիզա ՍՈՒՔԻԱՍՅԱՆ
