«ՀՀ կառավարության եւ Չինաստանի Ժողովրդական Հանրապետության կառավարության միջեւ տեխնիկատնտեսական համագործակցության մասին» համաձայնագիրը վավերացնելու վերաբերյալ օրենքի նախագիծն այսօր ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովում ստացավ դրական եզրակացություն։ Ինչպես հայտնեց հարցի զեկուցող, ՀՀ ԱԳ նախարարի տեղակալ Մնացական Սաֆարյանը (լուսանկարում) համաձայնագիրը ստորագրվել է 2021 թվականի նոյեմբերի 15-ին:
«Համաձայնագրի վավերացման արդյունքում Չինաստանը Հայաստանին 100 մլն չինական յուանի չափով անհատույց օգնություն կտրամադրի՝ Հանրային հեռուստաընկերության հեռարձակման դահլիճի նախագծման եւ այլ՝ փոխհամաձայնեցված նախագծերի իրականացման համար։ Ծրագիրը նվիրված է Հանրային հեռուստաընկերության համար նոր կարողությունների ստեղծմանը։ 8-րդ տաղավարի նախագծման եւ շինարարության մասին է խոսքը, որին ուղղվելու է տրամադրվելիք գումարը։ 14-15 միլիոն դրամի մասին է խոսքը»,-նշեց փոխնախարարը։
Մնացական Սաֆարյանը նաեւ շեշտեց, որ Չինաստանի հետ գործակցության զարգացումը ՀՀ կառավարության արտաքին քաղաքական առաջնահերթություններից է․ վերջին 3 տասնամյակում Հայաստանի եւ Չինաստանի միջեւ կնքվել են 5 տասնյակից ավելի համաձայնագրեր եւ հուշագրեր։ Նշյալ համաձայնագիրը շուտով ԱԺ լիագումար նիստում ներկայացվելու է խորհրդարանի հաստատմանը։
Լուիզա ՍՈՒՔԻԱՍՅԱՆ
