«Վերջին տարիներին ՀՀ-ում անընդհատ բախվում ենք ընտրովի արդարադատությանը։ Այս դեպքը եւս կարող ենք համարել ընտրովի արդարադատության դրեւորում։ Երբ պետք է լինում, մարդիկ ներվում են։ երբ պետք է լինում, իշխանությունը աչք է փակում հանցանքների վրա։ Երբ Խաչատուրովը մասնակցում է հանրահավաքների, հետո ուշադրությունը մեծանում է նրա հանդեպ, եւ «կալանքն» անխուսափելի է դառնում։ Նման դեպքերում կալանքը համոզիչ չի կարող լինել»,-խորհրդարանում լրագրողների հետ ճեպազրույցում այսօր ասաց ԱԺ պատգամավոր, մարդու իրավունքների եւ հանրային հարցերի հանձնաժողովի նախագահ Թագուհի Թովմասյանը։
Հիշեցնենք, որ ԶՈՒ 3-րդ բանակային կորպուսի նախկին հրամանատար, գեներալ Գրիգորի Խաչատուրովը ձերբակալված է, եւ դատարանն այսօր քննում է նրան կալանավորելու հարցը։ Խաչատուրովի հետ կապված ՀՀ գլխավոր դատախազը վերջերս տվյալներ էր հրապարակել՝ «Հայաստան» խմբակցության պատգամավոր Սեյրան Օհանյանին վերաբերող քրեական գործի շրջանակում։
«Բանակում տեղի ունեցող եւ ունեցած իրադարձությունները քննվում են մի շարք քրեական գործերի շրջանակում, եւ Նիկոլ Փաշինյանին հակադրվածները դատապարտվում են։ Ովքեր չեն քննադատել, ստացել են պաշտոններ եւ վայելում են ազատությունը։ Դասական օրինակը Վաղարշակ Հարությունյանն է, որի օրոք եղել են նույն խայտառակ երեւույթները, բայց նա այսօր ՌԴ-ում ՀՀ դեսպան է եւ չի ներգրավվում որեւէ քրեական գործում»,-նշեց Թագուհի Թովմասյանը։
Կարդացեք նաև
Լուիզա ՍՈՒՔԻԱՍՅԱՆ
