Եվրամիության (ԵՄ) անդամ 27 երկրների արտաքին գործերի նախարարները վաղը՝ 20 փետրվարին, Բրյուսելում գումարելու են իրենց հերթական նիստը։ Նախարարների խորհրդի օրակարգում ներառված են նաև Հայաստան մեկնող դիտորդական առաքելության հարցը, Ուկրաինայի խնդիրը և Իրանի Իսլամական Հանրապետության դեմ նոր պատժամիջոցներ կիրառելու հավանականությունը։
Եվրոպական խորհրդարանը (ԵԽ) իր 19 հունվարի 2023 թվականի նիստում Եվրախորհրդից պահանջեց «Իսլամական հեղափոխության պաշտպան զորք»-ին ներառել ահաբեկչական խմբերի ցուցակում և, ըստ այդմ, պատժամիջոցներ կիրառել նրա անդամների դեմ։ Այդ զորքը հիմնվել է Իրանի Իսլամական Հեղափոխությունից հետո և գործունեություն է ծավալել Իրանի սահմաններից դուրս։ Եվրախորհրդարանի բանաձևերը Եվրամիության համար պարտադիր չեն և հիմա հարցը պետք է քննարկվի Եվրախորհրդում։ Եվրամիության արտաքին գործերի և անվտանգության քաղաքականության հարցերով բարձր ներկայացուցիչ Ժոզեֆ Բորելը մինչ այժմ վերապահություն է հայտնել այդ բանաձևի կապակցությամբ և հայտնել է, որ նման որոշման համար ԵՄ որևէ անդամ երկրի դատարանի որոշում է պետք։
Իրանի մի խումբ ընդդիմադիրներ հույս ունեն, որ նրանք Եվրախորհրդի վաղվա նիստում մասնակի հաջողություն կունենան․ փորձագետների կարծիքով ԵՄ-ն «Իսլամական հեղափոխության պաշտպան զորք»-ին չի ճանաչի որպես ահաբեկչական խումբ, բայց իրանցի մի շարք բարձրաստիճան պաշտոնյաների դեմ նոր պատժամիջոցներ կսահմանի։ Մի խումբ իրանցիներ արդեն երեք օր է, ինչ Մյունխենի անվտանգության համաժողովի ընթացքում ցույցեր են կատարում և հիմա էլ Բրյուսելի վաղվա ցույցի համար են պատրաստվում։
Կարդացեք նաև
Եվրակառույցներում ԻԻՀ-ի դեմ մթնոլորտ ստեղծելու գործում մեծ դեր ունեն նաև իրանական սփյուռքի ներկայացուցիչները, որոնք վերջին տարիների ընթացքում բարձր դիրքերի են հասել Եվրոպայում․ այժմ իրանցի երկքաղաքացի պատգամավորներ, նախարարներ ու քաղաքապետեր կան Շվեդիայում, Գերմանիայում, Բելգիայում ու Ֆրանսիայում։ Բրյուսելի վաղվա ցույցը գլխավորելու են Բելգիայի խորհրդարանի պատգամավոր իրանուհի Դարյա Սաֆային, Շվեդիայի խորհրդարանի պատգամավոր իրանցի Ալիռեզա Ախոնդին և նրանց քուրդ ու արաբ պաշտոնակիցները։
Իրանցի տարագիր հայրենակիցների համախմբվածությունը և գործունեությունը մտահոգում է Իրանի Իսլամական Պետության պատասխանատուներին․ այս առիթով արտահայտվել են մի շարք պաշտոնյաներ և ակնարկել են վերջին ամիսներում միջազգային ատյաններում ԻԻՀ-ի ԱԳՆ-ի ունեցած ձախողումներին։ ԱԳՆ նախկին փոխնախարար Արաղչին «Ջամարան նյուզ»-ին տված հարցազրույցում արտերկրի իրանցիների ակտիվացումը ԻԻՀ-ին հեղինակազրկելու մի մեծ խաղի մաս է համարել․ դա ազդում է երկրի արտաքին հարաբերությունների վրա և ԻԻՀ-ից հեռավորություն պահելու և կասկածամտության մթնոլորտ է ստեղծում, որի դեմը պետք է առնել․ ասել է նախկին փոխնախարարը, որն հիմա Իրանի արտաքին քաղաքականության ռազմավարության խորհրդի քարտուղարն է։
Տիգրան ԴԱՎՈՒԴՅԱՆ
