Aravot.am-ի տեղեկություններով, ՀՀ Հակակոռուպցիոն կոմիտեն սկսել է քննել Շիրակի մարզի ընդհանուր իրավասության դատարանի Արթիկի և Մարալիկի նստավայրերում որոշակի հաստիքներ զբաղեցնող մարդկանց՝ աշխատանքի ներկայանալ-չներկայանալու հարցը։
Փաստաթղթերն հակակոռուպցիոն կոմիտե է ուղարկել ՀՀ ՆԳՆ ոստիկանության Շիրակի մարզային վարչությունը։ Հակակոռուպցիոն կոմիտեում պիտի քննվի քրեական վարույթ նախաձեռնելու հարցը։
Բանն այն է, որ Երևանում բնակվող թոշակառու Ս․Ա․-ն դիմում-բողոք է ներկայացրել ոստիկանություն՝ Շիրակի մարզի ընդհանուր իրավասության դատարանի հաստիքների վերաբերյալ։
Ոստիկանությունն էլ օպերատիվ- հետախուզական միջոցառումներ է ձեռնարկել ու պարզել, որ Շիրակի մարզի ընդհանուր իրավասության առաջին ատյանի դատարանի աշխատակազմի ղեկավար Ս․Հ․-ն իր ծառայողական պարտականությունները ոչ պատշաճ է կատարել, համապատասխան հսկողություն չի իրականացրել, որի պատճառով էլ էական վնաս է հասցվել պետությանը։
Կարդացեք նաև
Մասնավորապես, ըստ ոստիկանության բացահայտման, Արթիկի բնակչուհիներից մեկը՝ Մ․Մ․-ն, Շիրակի մարզի ընդհանուր իրավասության առաջին ատյանի դատարանի Արթիկի նստավայրում հրամանագրված լինելով որպես հավաքարար, ստացել է աշխատավարձ, սակայն աշխատանքի չի հաճախել։ Վերջին 7 ամիսներին նա մշտական բնակվել է Երևանում, իսկ նրա փոխարեն աշխատանքի հաճախումների մատյանը ամեն օր ստորագրել է նույն դատարանում որպես ցրիչ աշխատող ամուսնու մայրը։
Ոստիկանությունը մեկ այլ բացահայտում էլ կատարել է Շիրակի մարզի ընդհանուր իրավասության դատարանի Մարալիկի նստավայրում։ Ոստիկանությունը պարզել է, որ Շիրակի մարզի ընդհանուր իրավասության դատարանի Մարալիկի նստավայրում որպես գործավարուհի աշխատող Ա․Ա․-ի եղբայրն ու սկեսրայրը այդ նույն դատարանում աշխատելով որպես հնոցպաններ՝ 24 ժամյա հերթափոխի ընթացքում աշխատավայրում մնացել են մինչև ընդմիջման ժամը: Ա.Ա․-ի սկեսուրը, ևս նույն դատարանում աշխատելով որպես հավաքարար, աշխատանքային օրերին աշխատավայրում մնացել է ընդամենը 2-3 ժամ:
Ոստիկանության օպերատիվ-հետախուզական միջոցառումների շրջանակում պարզվել է նաև, որ Մարալիկի դատարանի դատավորի օգնականի ամուսինը նույն դատարանում հրամանագրված լինելով որպես էլեկտրիկ, հաճախակի աշխատանքի չի հաճախել, իսկ աշխատանքի ներկայացած օրերին աշխատավայրում մնացել է ընդամենը մեկ ժամ՝ ժամը 11.00-ից 12.00-ը սահմանները։
