Եթե կա մեկը, որը խաթարում է հայ-ադրբեջանական կարգավորման գործընթացին, ապա դա արևմտյան երկրներն են՝ ԱՄՆ-ի գլխավորությամբ: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան ՝ ի պատասխան Պետդեպի՝ Ռուսաստանի հասցեին նույնանման մեղադրանքի: Զախարովան նշել է, որ ԵԱՀԿ Մինսկի խումբը պատմության աղբանոցն է ուղարկվել դեռ անցյալ տարվա փետրվարին, երբ ԱՄՆ և Ֆրանսիայի համանախագահները մտացածին պատճառներով դադարեցրին գործակցությունն իրենց ռուս գործընկերոջ հետ:
«Դրան այդպես էլ հստակ բացատրություն չհետևեց: Դա հաշվի առնելով՝ մենք կենտրոնացանք Երևանին ու Բաքվին եռակողմ ձևաչափերով աջակցություն ցուցաբերելու վրա՝ շեշտը դնելով բարձր մակարդակով համապատասխան պայմանավորվածությունների համալիրի վրա, որի մասին բազմիցս խոսել և բացատրել ենք»,- ասել է Զախարովան:
Ինչ վերաբերում է հայ-ադրբեջանական կարգավորման գործում ԱՄՆ միջնորդությանը, Զախարովան ասել է, թե իրենք չեն նկատում, որ դա լի է իրական քայլերով, և որ այն որևէ հավելյալ արժեք է ստեղծում:
Միաժամանակ Զախարովան նշել է, որ Ռուսաստանը վերահաստատում է պատրաստակամությունը՝ Մոսկվայում կազմակերպելու հանդիպում Հայաստանի և Ադրբեջանի արտգործնախարարների մեջև այն բանից հետո, երբ երեկ հայկական կողմը հայտարարեց, որ ավարտին է հասցրել ադրբեջանական առաջարկների վրա աշխատանքները:
Կարդացեք նաև
Այդ համատեքստում Զախարովան առանձնացրել է Ռուսաստանի ԱԳՆ՝ Հարավային Կովկասի հարցերով հատուկ ներկայացուցիչ Իգոր Խովաևի «արդյունավետ» այցը Բաքու և Երևան, որի ընթացքում երկու կողմերն էլ վերահաստատել են իրենց շահագրգռվածությունը Մոսկվայի միջնորդության հարցում:
https://www.youtube.com/watch?v=58JYQCg4PXk&ab_channel=SevastopolLife
Պատրաստեց Վիկտորյա ԱՆԴՐԵԱՍՅԱՆԸ
