Իրաքի Հանրապետության 24-ամյա քաղաքացի Ալի Նաջաթ Աղա Աղան Հայաստանի սահման հասնելով՝ զարմացել է, որ 3 օր առաջ Իրաքում գնած բաճկոնն ունի պատռված մաս։ Առաջինը դա նկատել են մաքսատան ծառայողներն ու պատռելով բաճկոնի աջ թեւատակի հատվածը՝ ինչ-որ փաթեթ են հանել։ Նախաքննական մարմնին տված ցուցմունքում Աղա Աղան նշել է՝ որ տեղեկություն չունի թե ո՞ւմն է փաթեթը եւ ինչպե՞ս է հայտնվել իր բաճկոնի մեջ։
Աղա Աղայի խոսքով՝ ինքը երբեք թմրանյութ չի օգտագործել, թմրանյութերի առք ու վաճառքով չի զբաղվել։
Հետագայում, պարզվել է, որ 24-ամյա իրաքցին 2022թ. հոկտեմբերի 13-ին ոտքով հատելով ՀՀ պետական սահմանը, Իրանից մաքսանենգությամբ՝ մաքսային հսկողությունից թաքցնելու եղանակով ապօրինի Հայաստան է տեղափոխել առանձնապես խոշոր չափերով՝ 7.25 գրամ «մեթամֆետամին» տեսակի թմրամիջոց և այն առանց իրացնելու նպատակի ապօրինի պահել իր մոտ: Սյունիքի մարզի ընդհանուր իրավասության դատարանում Ալի Նաջաթ Աղա Աղան հրաժարվել է ցուցմունք տալուց եւ ընդունել է մեղքը։
Նախագահող դատավոր Նապոլեոն Օհանյանի դատավճռով՝ իրաքցի երիտասարդը մեղավոր է ճանաչվել 396 հոդվածի 3-րդ մասի (առանձնապես խոշոր չափերով թմրամիջոցների, հոգեմետ (հոգեներգործուն) նյութերի, դրանց պատրաստուկների կամ դրանց համարժեք նյութերի (անալոգի) կամ պրեկուրսորների ապօրինի շրջանառությունն առանց իրացնելու նպատակի) եւ 399 հոդվածի 3-րդ մասի 2-րդ կետի (առանձնապես խոշոր չափերով թմրամիջոցների, հոգեմետ (հոգեներգործուն) նյութերի, դրանց պատրաստուկների, դրանց համարժեք նյութերի (անալոգի) կամ դրանց պրեկուրսորների մաքսանենգությունը) հատկանիշներով։
Կարդացեք նաև
ՀՀ քրեական օրենսգրքի 74 հոդվածի 5-րդ մասի կիրառմամբ՝ հանցագործությունների համակցությամբ, նշանակված պատիժները մասնակիորեն գումարելու միջոցով՝ Ալի Նաջաթ Աղա Աղայի նկատմամբ դատարանը վերջնական պատիժ սահմանեց ազատազրկում 6 տարի 3 ամիս ժամկետով:
Պատիժը կրելու սկիզբն հաշվարկվում է 2022 թվականի հոկտեմբերի 13-ից:
Դատավճիռը հրապարակվել է 2023թ․ փետրվարի 13-ին եւ այն ստանալուց հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։
Արմեն ԴԱՎԹՅԱՆ
