«Երկրաշարժի հետևանքով Սիրիա և Թուրքիա հումանիտար օգնություն է ուղարկվել՝ հաշվի առնելով առնելով երկրների կարիքները»,- կառավարության նիստից հետո, պատասխանելով լրագրողների այն հարցին, թե ինչո՞ւ է Սիրիային ՀՀ-ն 30 և 25 տոննա օգնություն ուղարկել, իսկ Թուրքիա ուղարկած միայն առաջին օգնությունը 100 տոննա էր, ասաց արտակարգ իրավիճակների նախարար Արմեն Փամբուխչյանը:
«Օգնությունն ուղարկվել է ըստ նշված կարիքների. երկու երկրներին ընդհանուր 180 տոննա բեռ է ուղարկվել»,–ասաց Փամբուխչյանը՝ ավելացնելով, որ հայ փրկարարները երկու երկրներում ավարտել են իրենց աշխատանքները։ Նա չմանրամասնեց Թուրքիային տրամադրած բեռի ծավալները, միայն ասաց, որ, ընդհանուր առմամբ, երկրաշարժից տուժած Սիրիային ու Թուրքիային ՀՀ կառավարության պահուստային ֆոնդից հատկացվել է 158 մլն դրամ։
Լրագրողի հարցին, թե որևէ ակնկալիք ունե՞ն Թուրքիայից, որ մարդասիրական օգնություններից հետո կփոխի ՀՀ-ի նկատմամբ վերաբերմունքը` նա ընդամենն ասաց, որ թե ՀՀ-ն իր մարդասիրական գործառույթներն է անում, մնացածի մասով պարզապես լռեց:
Մեկ այլ հարցի, թե ԱԻՆ-ի միջոցով արդյո՞ք շրջափակման մեջ գտնվող Արցախ մարդասիրական օգնություն ուղարկել են` Փամբուխչյանը պատասխանեց, որ՝ ոչ։ Նա, սակայն, հիշեցրեց, որ մոտ մեկ ամիս առաջ ՀՀ կառավարությունը հավելյալ 4 մլրդ դրամ է հատկացրել Արցախին։
Կարդացեք նաև
Լուսինե ՄԱՐԳԱՐՅԱՆ
