Փետրվարի 13-ին Դալլասի հայկական համայնքի մի խումբ ներկայացուցիչներ հավաքվել էին տեղի «FOX News» այնուհետև «ABC News» լրատվամիջոցների առջև, որպեսզի հորդորեն լուսաբանել Բաքվի ապօրինի գործելակերպը և Արցախում առկա մարդասիրական աղետը:
Երկու ԶԼՄ-ներից մեկական ներկայացուցիչ դուրս եկան և վերցրին նամակները՝ հավաստիացնելով, որ դրանք կփոխանցեն իրենց ղեկավարությանը: «Նամակի հիմնական նպատակն է՝ լույս սփռել արդեն երկու ամիս շրջափակված Արցախի վրա,» – հայտնում է նամակի համահեղինակ Աննա Խաչատրյանը: Նա 15 տարվա մանկավարժ է, հիասթափված է, որ աշխարհին չի հետաքրքրում 30.000 երեխայի իրավունքների ամենօրյա ոտնահարումը: «30.000 երեխա մնացել է առանց սննդի, առանց էլեկտրականության և առանց կրթության, ու սա պետք է լուսաբանվի,» – ընդգծում է մանկավարժը:
Իր խոսքում Աննա Խաչատրյանը նշում է նաև, որ Տեխասի հայ մարդու իրավունքների պաշտպանության կոալիցիան, որը հիմնադրվել է նախորդ ամիս, դիմել է Տեխասը ներկայացնող ԱՄՆ սենատոր Թեդ Քրուզին: Սենատորի գրասենյակից փոխանցել են, որ տեղյակ են Լաչինի միջանցքի արգելափակումից, խոստացել մոտակա օրերին հանգամանալից արձագանք տալ դիմումին: Հավաքին մասնակցում էին զգալի թվով երեխաներ, որոնք մտահոգված էին Արցախի իրենց հասակակիցների առողջությամբ և ապրուստով: «Պիտի պայքարենք, որ երեխաները նորից ուտելիք ունենան ու ուրախ լինեն,» – շեշտում է իննամյա Մայքլը:
Լրատվամիջոցներին ուղղված նամակի համահեղինակ Հասմիկ Ղարաղազարյանի քույրն Արցախում է: Ղարաղազարյանը նշում է, որ իրականությունը շատ ճնշող է: «Քույրս պատմում է, որ այնտեղ կարտոֆիլը դարձել է բացառիկ մի բան: Երեխաները մրգերի համը մոռացել են: Այստեղ՝ դրսում, փորձում ենք անել ամեն հնարավորը իրավիճակը շտկելու համար,» – ասում է նա:
Կարդացեք նաև
Մասնակիցներից Հերմինե Աղյարյանն ընդգծում է, որ չափից շատ են ձգվում Ադրբեջանի ապօրինությունները: Նրա խոսքով՝ ցավալի է, որ պատշաճ լուսաբանման բացակայության պատճառով մեծամասնությունը նույնիսկ 2020 թվականի պատերազմից տեղյակ չէ: «Այն ինչ կապված է Հայաստանի հետ շատ կարևոր է մեզ համար: Շատ ազդված ենք: Ուզում ենք աշխարհը մտածի, մի լուծում գտնի, որովհետև 120.000 մարդ, այդ թվում՝ 30.000 երեխա տանջվում են,»- նշում է Աղյարյանը:
Արսեն ԱՅՎԱԶՅԱՆ
