Aravot.am-ի տեղեկություններով՝ փետրվարի 10-ին Երեւանի «Խ.Աբովյանի անվան» թիվ 2 հիմնական դպրոցի վեցերորդ դասարաններից մեկի դասղեկը ոստիկանության կենտրոնի բաժնում հաղորդում է ներկայացրել՝ հայտնելով, որ հունվարի 19-ին դասարանի «Վայբեր» հավելվածի խմբում հայտնվել է «Սիգմա Ադմին» անվանումով անհայտ անձ, որը պարբերաբար սպառնալիքներ է գրում խմբում գտնվող երեխաներին:
Դպրոցի տնօրեն Նարինե Նազարյանը կատարվածն ավելի շատ երեխայական արարք է գնահատում. «Դա, իմ կարծիքով, երեխայական բան է՝ դասարանի աշակերտների հետ կապված, ու վերջ, այդքանով սահմանափակվում է: Ապահովության համար ենք դիմել իրավապահներին, որ այլեւս չլինի նման բան, մանկական ինչ-որ չարաճճիություն է, չէի ուզի, որ բոլոլա դառնար: Իրականում մեջը ոչինչ չկա: Ծնողների հանգստության համար ենք նաեւ դիմել, իրականում մանկական խաղ է, երեխա են, սխալվել են»,- մեզ հետ զրույցում ասաց տնօրենը: Նկատենք, որ այդ անունով մանկական տեսախաղ կա, եւ տնօրենի տեսակետը, թերեւս, հիմնավոր է:
Մեր ճշտող հարցին՝ տնօրինությունը պարզե՞լ է, թե ով է այդ արարքի հեղինակը, աշակերտների՞ց է, ի պատասխան տնօրենն ասաց՝ արարքի հեղինակը փակ օգտատեր է, որին հնարավոր չէ նույնիսկ զանգել. «Ակտիվ չէ որպես բաժանորդ, որեւէ մեկը չի կարող հետաքննություն անել, պարզել, դա իրավապահների գործն է»: Նարինե Նազարյանը նաեւ ասաց, որ այդ դասարանում դասերը բնականոն ընթանում են, երեխաները լավ հոգեվիճակում են:
Քննչական կոմիտեի նախագահի մամուլի քարտուղար Գոռ Աբրահամյանը Aravot.am-ի հետ զրույցում ասաց, որ այդ դեպքով նախաձեռնվել է քրեական վարույթ՝ Քր. օրենսգրքի 258 հոդվածի 1-ին մասի հատկանիշներով (առերեւույթ շորթման հատկանիշներով): Տվյալներն այն մասին են, որ անհայտ անձը, հայտնվելով աշակերտների սոցցանցերից մեկում գրանցված խումբ, որոշակի սպառնալիքներ հնչեցնելու միջոցով գումարային պահանջներ է ներկայացրել: Նախաքննությունն է իրականացվում, այս պահին անձի ինքնությունը պարզված չէ: Համապատասխան վարույթային ու քննչական գործողություններ են կատարվում այդ հանգամանքը պարզելու համար: Առերեւույթ հանցագործությունը կատարվել է կիբեր տիրույթում եւ որոշակի բարդություններ է առաջանում, երբ որ անձը գործում է ոչ իր տվյալներով:
Կարդացեք նաև
Արփինե ՍԻՄՈՆՅԱՆ
