«2022-ին Հայաստանում ներդրումների ծավալն աճել է»,-այս մասին այսօր կառավարության նիստից հետո լրագրողների հետ ճեպազրույցում ասաց էկոնոմիկայի նախարար Վահան Քերոբյանը։ Նրա խոսքով՝ վիճակագրական տվյալներն ամբողջական ներդրումների վերաբերյալ դեռ չեն հրապարակվել, սակայն 9 ամսվա տվյալներով՝ ներդրումների ծավալն աճել է մոտ 20%-ով, իսկ օտարերկրյա ուղղակի ներդրումներն աճել են եւ հասել մոտ 700 մլն դոլարի․«Հույս կա, որ տարվա արդյունքներով կունենանք 1 միլիարդին մոտ թիվ՝ հաշվի առնելով տեղի ունեցող զարգացումները, իսկ դա ռեկորդային բարձր թիվ է»։
Նախարարի խոսքով՝ կառավարության ծրագրի համաձայն ներդրումներ- ՀՆԱ հարաբերակցությունը պետք է հասցնել մինչեւ 25%-ի, հիմա այդ հարաբերակցությունը 18%-ի սահմաններում է։
«Օտարերկրյա ուղղակի ներդրումների առումով մենք ուշադրությունը դարձնում ենք աշխարհի 500 խոշորագույն ընկերություններին Հայաստան բերելու ուղղությամբ, որովհետեւ այդ ընկերությունները միասին երկու անգամ ավելի շատ գումար են ծախսում գիտահետազոտական աշխատանքների եւ գիտության զարգացման վրա, քան աշխարհի բոլոր կառավարություններն ու բոլոր ընկերությունները միասին վերցրած։ Այդ ընկերություններից յուրաքանչյուրի մուտքը Հայաստան գերարժեքավոր է մեզ համար։ Շատ շուտով կունենանք լավ նորություն, գործարք կա, որը շուտով կավարտվի՝ ամերիկյան խոշորագույն ընկերություններից մեկը Հայաստանում ընկերություն ձեռք բերելու միջոցով կմտնի Հայաստան»,-ասաց Քերոբյանը։
Նելլի ԲԱԲԱՅԱՆ
