«Լրացուցիչ դժվարություններ են առաջացել դիզվառելիքի ներմուծման հետ կապված, որովհետեւ ուժի մեջ են մտել նավթամթերքին առնչվող Ռուսաստանի դեմ պատժամիջոցները, հետեւաբար, դժվար է պատկերացնել, թե երբ Հայաստանի լաստանավային հաղորդակցության հարցը լուծում կստանա»,-այս մասին այսօր կառավարության նիստից հետո լրագրողների հետ ճեպազրույցում ասաց էկոնոմիկայի նախարար Վահան Քերոբյանը՝ ի պատասխան հարցի՝ թե ո՞ր փուլում է լաստանավի շահագործման հարցը։
Նա հավելեց՝ ամենօրյա ռեժիմով աշխատում են այդ ուղղությամբ եւ լաստանավային հաղորդակցության կարեւորությունն աճել է։
Անդրադառնալով վառելիքի խնդրին՝ ասաց՝ եթե կառավարությունը չկարողանա լուծել դիզվառելիքի անխափան մատակարարման հարցը, ապա, ամենայն հավանականությամբ, Հայաստանում դիզվառելիքի գինը կաճի․«Բայց մենք ամենօրյա, ամենժամյա ռեժիմով աշխատում ենք Վրաստանի, Ռուսաստանի եւ մյուս բոլոր երկրների մեր գործընկերների հետ, որպեսզի պարենային անվտանգության կարեւորագույն բաղադրիչի՝ դիզվառելիքի պակաս Հայաստանը չունենա»,– ասաց նախարարը։
Նելլի ԲԱԲԱՅԱՆ
