Լաչինի միջանցքի շարունակվող շրջափակումը վտանգում է Լեռնային Ղարաբաղի հազարավոր մարդկանց կյանքը, այսօր հայտարարել է Amnesty International-ը: Իրավապաշտպան կազմակերպությունը «կոչ է արել Ադրբեջանի իշխանություններին և ռուս խաղաղապահներին անհապաղ ապաշրջափակել երթուղին և վերջ դնել ծավալվող հումանիտար ճգնաժամին»։
Կազմակերպությունը հարցազրույցներ է անցկացրել տարածաշրջանի բուժաշխատողների և բնակիչների հետ՝ բացահայտելով շրջափակման առանձնահատուկ ծանր ազդեցությունը ռիսկային խմբերի, այդ թվում՝ կանանց, տարեցների և հաշմանդամություն ունեցող անձանց վրա:
«Շրջափակումը հանգեցրել է սննդի և բժշկական պարագաների խիստ պակասի, քանի որ Կարմիր խաչի միջազգային կոմիտեի և ռուս խաղաղապահների կողմից տրամադրվող մարդասիրական օգնությունը բավարար չէ պահանջարկը բավարարելու համար: Էլեկտրաէներգիայի, բնական գազի և փոխադրամիջոցների վառելիքի մատակարարման խափանումները ծայրահեղ դժվարություններ են առաջացնում հատկապես այն խմբերի համար, որոնք խոցելի են: Սա պետք է դադարի հիմա», – ասել է Amnesty International-ի Արևելյան Եվրոպայի և Կենտրոնական Ասիայի հարցերով բաժնի տնօրեն Մարի Ստրաթերզը:
«Ադրբեջանի իշխանությունները վերահսկողություն են իրականացնում այն տարածքի նկատմամբ, որտեղից իրականացվում է շրջափակումը։ Ադրբեջանի պարտավորությունն է ապահովել, որ Լեռնային Ղարաբաղի բնակչությանը չզրկվի սննդամթերքի և այլ առաջին անհրաժեշտության ապրանքների և դեղորայքի հասանելիությունից: Իր հերթին, ռուսական խաղաղապահ առաքելությանը մանդատ է տրված՝ ապահովել Լաչինի միջանցքի անվտանգությունը։ Այդուհանդերձ, երկու կողմերն էլ ակնհայտորեն չեն կատարում իրենց պարտավորությունները», – հավելել է Մարի Ստրաթերսը։
Կարդացեք նաև
Amnesty International-ի հրապարակած հոդվածն անդրադառնում է Արցախում գրեթե երկու ամիս տիրող ծանր իրավիճակին. տարածաշրջան մտնող փոխադրամիջոցների թիվը կրճատվել է օրական 1200-ից մինչև 5-6-ի:
Իրավապաշտպան կազմակերպությունը զրուցել է Ստեփանակերտի հիվանդանոցի սրտաբան Վարդան Լալայանի, նյարդաբան Բիայնա Սուխուդյանի հետ, որոնք ներկայացրել են դեղամիջոցների և բժշկական անհրաժեշտ պարագաների պակասի պատճառով հիվանդների համար ստեղծված ծանր վիճակը:
Amnesty International-ը զրուցել է նաև Արցախի բնակիչների հետ: Համաձայն այդ հարցազրույցների՝ սննդի, մասնավորապես՝ մրգերի և բանջարեղենի պակասի պատճառով կանանց և երեխաների շրջանում զգալիորեն ավելացել են իմունոդեֆիցիտի, սակավարյունության, վահանաձև գեղձի հիվանդությունների, դիաբետի վատթարացման դեպքերը: Հղի կանանց մոտ նույնպես բարդացումներ են առաջացել, ավելացել են հղիության ընդհատման կամ վաղ ծննդաբերության դեպքերը:
Իրավապաշտպան կազմակերպությունը նաև ուշադրություն է հրավիրում այն փաստի վրա, որ խախտվել է կրթության իրավունքը, քանի որ ջեռուցման և էլեկտրաէներգիայի անջատումների պատճառով դպրոցները և մանկապարտեզները ժամանակավորապես փակ են եղել:
«Արդեն շրջափակման իններորդ շաբաթն է, բոլոր հայացքներն ուղղված են Ադրբեջանի իշխանություններին և ռուս խաղաղապահներին: Կոչ ենք անում երկու կողմերին՝ մարդու իրավունքների միջազգային չափանիշներին համապատասխան անհապաղ ձեռնարկել արդյունավետ միջոցներ՝ անհետաձգելի կերպով դադարեցնելու Լաչինի միջանցքի շրջափակումը և վերջ դնելու ծավալվող հումանիտար ճգնաժամին», – նշել է Մարի Ստրաթերսը։
Թարգմանությունը՝ «Արմենպրես»-ի:
