Թուրքիայում և Սիրիայում երկրաշարժի զոհերի թիվը գերազանցում է 16 հազարը, հայտնում է BBC-ն: Թուրքիայի նախագահ Ռեջեբ Թայիփ Էրդողանի քննադատները կարծում են, որ իշխանությունները շատ դանդաղ են արձագանքել աղետին, և վատ են պատրաստված եղել դրան:
Էրդողանը խոստովանել է, որ եղել են «որոշակի խնդիրներ», սակայն այժմ, նրա խոսքով, իրավիճակը վերահսկողության տակ է:
Երկրի խոշորագույն ընդդիմադիր կուսակցության ղեկավար, առաջիկա ընտրություններում Էրդողանի հիմնական մրցակից Քեմալ Քըլըչդարօղլուն նրա հետ չի համաձայնել: «Եթե կա մեկ մարդ, ով պատասխանատու է սրա համար, դա Էրդողանն է»,- ասել է նա:
Արդեն երրորդ օրն է, փլատակների տակ դեռ մարդիկ կան: Տուժած շրջաններում ջերմաստիճանը զրոյից ցածր է, ինչը նվազեցնում է փլատակների տակից ողջ մնացած մարդկանց հանելու հավանականությունը: Բացի այդ, ողջ մնացածները զրկվել են տանիքից և գիշերում են փողոցում, ինչը բարձրացնում է ցրտահարվելու ռիսկերը:
Կարդացեք նաև
«Կա երկրորդային աղետի իրական վտանգ, որը կարող է վնաս հասցնել ավելի մեծ թվով մարդկանց, քան հաշվվում էր սկզբում»,- ասել է Առողջապահության համաշխարհային կազմակերպության՝ երկրաշարժի հետևնաքների չեզոքացման մենեջեր Ռոբերտ Հոլդենը:
Հարևան Սիրիայում իրավիճակն առավել ծանր է: Նախքան երկրաշարժը Թուրքիայի հետ սահմանին բաց էր միակ անցակետը՝ Բաբ ալ-Հաուան: Սակայն հիմա դեպի անցակետ տանող ճանապարհն արգելափակված է և անանցանելի է:
ՄԱԿ-ում հույս են հայտնել, որ կհաջողվի արագ վերականգնել դեպի անցակետ տանող ենթակառուցվածքները: Թուրքիայի իշխանություններն իրենց հերթին ասում են, որ շուտով ևս երկու անցակետ կբացեն:
Հայտնի է, որ Թուրքիային սահմանակցող Իդլիբ նահանգում, որը գտնվում է Սիրիայի նախագահ Բաշար ալ-Ասադի վերահսկողությունից դուրս, զոհվել է 1500 մարդ:
Սիրիայի իշխանություններն ասում են, որ արևմտյան պատժամիջոցներն ավելի են խորացնում աղետը: «Եվրոպական և ամերիկյան պատժամիջոցների պատճառով մենք ունենք բուլդոզերների պակաս, չեն հերիքում վերամբարձ կռունկները, չի հերիքում նավթը»,- ասել է Ասադի խորհրդական Բութայնա Շաբաանը:
Պատրաստեց Վիկտորյա ԱՆԴՐԵԱՍՅԱՆԸ
