«Սարգիս Խանդանյանը երեկվա իր հայտարարություններով դեմ է ՀՀ-ի ազգային անվտանգության ռազմավարությանը, որն ընդունվել է 2020թ․-ի հուլիսին»,-ԱԺ 8-րդ գումարման 5-րդ նստաշրջանի հերթական նիստում այսօր հայտարարեց «Հայաստան» խմբակցության պատգամավոր Գեղամ Մանուկյանը՝ անդրադառնալով այն փաստին, որ երեկ ԱԺ արտաքին հարաբերությունների հանձնաժողովի նախագահի թեկնածու, ՔՊ խմբակցության պատգամավոր Սարգիս Խանդանյանը հարցերին ի պատասխան չփաստեց, որ Թուրքիան սպառնալիք է ՀՀ-ի համար։
Գեղամ Մանուկյանը նշեց․ «Նա ոչ միայն խուսափեց հայտարարել, որ Թուրքիան մեզ վտանգ ներկայացնող պետություն է, այլեւ իր գործընկերների հետ փորձեց հակառակը ցույց տալ։ Մինչդեռ 2020թ․-ի ազգային անվտանգության ռազմավարության մեջ հստակ ամրագրվում են Թուրքիայի հակահայ, հակահայաստանյան գործողությունները։ Հիմա ՀՀ-ի համար Թուրքիան վտանգ ներկայացնո՞ւմ է, թե՞ ոչ։ Գրված է ռազմավարությունում, որ ՀՀ-ի հանդեպ Թուրքիան վարում է ոչ բարիդրացիական քաղաքականություն՝ շարունակելով ՀՀ-ի շրջափակումը, հրաժարվելով առանց նախապայմանների դիվանագիտական հարաբերություններ հաստատել, ժխտելով ու արդարացնելով հայոց ցեղասպանությունը։ Նույնը հիմա շարունակվում է»։
Մանուկյանը մեկ այլ հատված էլ ընթերցեց, որ՝ միաժամանակ Թուրքիայի ռազմաքաղաքական աջակցությունն Ադրբեջանին ավելի է ուժեղացնում ԼՂ հակամարտությունը ռազմական ճանապարհով լուծելու Ադրբեջանի հավակնությունները․ հատկապես խնդրահարույց է Ադրբեջանի կողմից ռազմական գործողությունների նախաձեռնման դեպքում Թուրքիայի քողարկված կամ բացահայտ միջամտության պատրաստակամությունը։
Պատգամավորը շեշտեց․ «2020թ․ հուլիսին ազգային ռազմավարությունում կանխատեսվել է, որ Թուրքիան անմիջական մասնակցություն կարող է ունենալ ռազմական գործողություններին, իսկ երկիրը ղեկավարող քաղաքական ուժն ի՞նչ էր անում։ Մակունցն այդ ժամանակ ասում էր, որ եթե կոնֆլիկտ լինի, Թուրքիան չի միջամտի ռազմական գործողություններին։ Ա՛յ այսպես են երկիր կառավարել, սիրելի հայրենակիցներ»։
Կարդացեք նաև
Ապա Գեղամ Մանուկյանը դիմեց ՔՊ խմբակցության պատգամավոր Կնյազ Հասանովին․ «Թուրքիայում երկրաշարժ է՝ աղետ, ու այդ նույն Թուրքիան երկու օր առաջ Կնյազ Հասանովի հայրենակիցներին գնդակոծել է հյուսիսային Սիրիայում։ Թուրքիան նո՞ւյնն է մնացել, պարոն Հասանով, թե՞ ոչ՝ ասեք։ Այդ նույն Թուրքիան հրաժարվել է ընդունել Կիպրոսի Հանրապետության օգնությունը, որովհետեւ ինքը տարբերակում է դնում։ Երեկ 1999 թվականը հիշեցրիք։ Ախր այդ ժամանակ Թուրքիան գլուխը որ բարձրացնում ու դեսպանի մակարդակով մի բան էր ասում Արցախի թեմայով, Հայաստանից գլխին տալիս էին։ 99-ի Թուրքիան բերում եք ու համեմատում 2020թ․-ի պատերազմում ամբողջական մասնակցություն ունեցած Թուրքիայի հե՞տ։ Նո՞ւյնն է»։
Լուիզա ՍՈՒՔԻԱՍՅԱՆ
