Ընդդիմությունն ԱԺ ամբիոնից խոսում է իշխանության՝ քաղաքական բարոյականություն չունենալու, երկիրը ծախելու, ապազգային մոտեցումների մասին, սակայն իր իսկ աշխատանքը խորհրդարանական դիվանագիտությունում տեսանելի չէ։ Այս մասին այսօր ԱԺ 8-րդ գումարման 5-րդ նստաշրջանի հերթական նիստում հայտարարեց ՔՊ խմբակցության պատգամավոր Լուսինե Բադալյանը։
«Հիշեցի, որ բոլոր նիստերի ժամանակ ընդդիմադիրները խոսում էին «Զանգեզուրի միջանցքի» մասին, մինչդեռ իշխանությունը պարբերաբար հորդորում էր այդ եզրույթը չօգտագործել, որովհետեւ միջանցք չկա։ Որոշ ժամանակ անց Ալիեւն ասաց, որ նոյեմբերի 9-ի փաստաթղթով նման բան չկա, որ ինքն է դա ներմուծել քաղաքական խոսույթ։ Ո՞վ լեգիտիմացրեց այդ արտահայտությունը եւ այնքան խոսեց, որ հանրությունն ընդունեց դա որպես ճշմարտություն, իսկ միջազգային հանրության համար դա դարձավ սովորական»,-հարցադրում արեց Լուսինե Բադալյանը։
Այսօր «Հայաստան» խմբակցության պատգամավոր Արթուր Խաչատրյանը հիշեցրել էր, որ Ադրբեջանը պահանջում է իր «պատմական» «Էրիվանն» ու «Գյոկչան»։ Լուսինե Բադալյանն այս առնչությամբ դիմեց ընդդիմադիրներին․ «Լավ կլիներ այս ամբիոնից դա ասելու փոխարեն Ալիեւին ասեիք՝ եթե հին Հունաստանը, Հռոմը եւ Իրանը որոշեն իրենց պատմական տարածքները վերականգնել, Ադրբեջանն ու Թուրքիան էլ տեղ չեն ունենա քարտեզի վրա։ Այն ժամանակ էլ պատերազմի մեղքն էիք մեր վրա բարդում։ Ո՞ւմ եք ուզում այդքան հուսահատորեն դուք արդարացնել։ Դա՞ է ձեր խորհրդարանական դիվանագիտությունը։ Ցավում եմ, որ մեր հանդեպ ատելությունը ջնջել է իշխանության եւ պետության դեմ աշխատելու նուրբ սահմանը»։
Լուսինե Բադալյանը նաեւ համոզմունք հայտնեց, որ Հայաստանի արտաքին քաղաքականությունն այնպիսի նշաձող է վերցրել, որը գուցե երբեւէ նախկինում չի ունեցել։
Կարդացեք նաև
Լուիզա ՍՈՒՔԻԱՍՅԱՆ
