ԱԺ 8-րդ գումարման 5-րդ նստաշրջանի հերթական նիստում այսօր քննարկվում է ՔՊ խմբակցության պատգամավոր Սարգիս Խանդանյանի՝ ԱԺ արտաքին հարաբերությունների հանձնաժողովի նախագահի պաշտոնում թեկնածությունը։ Հիշեցնենք, որ օրերս ՔՊ խմբակցության պատգամավոր Էդուարդ Աղաջանյանը (լուսանկարում) հրաժարական էր տվել ԱԺ արտաքին հարաբերությունների հանձնաժողովի նախագահի պաշտոնից, եւ ՔՊ-ն Սարգիս Խանդանյանին էր առաջադրել։
«Հայաստան» խմբակցության պատգամավոր Գեղամ Մանուկյանը հարց հղեց՝ ասելով, որ այն շատ լրագրողների անունից է․ «Ձեր ուժի իշխանության տարիներին խայտառակ ակնառու է կադրային քաղաքականությունում ոչ հաշվետու լինելը։ Նշանակում են, մի քանի ամիս հետո հանում, հետո դնում։ Վերջին աղմկոտ դեպքը ՄԻՊ-ն էր։ Ու պաշտոնյաները չեն բացատրում հրաժարականները։ Լրագրողները երկար ժամանակ է՝ փորձում են հասկանալ, թե այս պատասխանատու պահին Էդուարդ Աղաջանյանն ինչո՞ւ է հրաժարական տվել։ Հոգնե՞լ է, ինչպես մամուլն է գրում, Սինգապո՞ւր է ուզում գնալ, դեսպա՞ն է ուզում դառնալ։ Մամուլը ստիպված գրում է, որովհետեւ պարզաբանումներ չկան։ Դուք միշտ հպարտանում եք, որ բաց եք ու թափանցիկ, որ խոնարհվում եք ժողովրդի առաջ, բայց հաշվետվություն չեք տալիս։ Ինչո՞ւ 1,5 տարի պաշտոնավարումից հետո Աղաջանյանը լքեց պաշտոնը»։
Սարգիս Խանդանյանը պատասխանեց, որ հաշվետվողականության վերաբերյալ դիտարկման հետ համաձայն չէ․ «Հասցեատերը պարոն Աղաջանյանն է, բայց մենք, բնականաբար, քննարկել ենք հարցը, քանի որ ոչ միայն գործընկերներ ենք, այլեւ ընկերներ։ Սա պարոն Աղաջանյանի ցանկությունն է եղել՝ հաշվի առնելով նաեւ ռեսուրսների կազմակերպման, իր գործունեության շարունակման արդյունավետությունը։ Վստահ եմ, որ նա հարմար պահի կտա մեկնաբանություն։ Բայց նա ոչ մի տեղ չի գնում, շարունակում է լինել պատգամավոր ու հանձնաժողովի անդամ»։
Լուիզա ՍՈՒՔԻԱՍՅԱՆ
