44-օրյա պատերազմում զոհված Հայկ Մելիքյանի մայրը՝ Նաիրա Մելիքյանը, «Հայելի» ակումբում անդրադառնալով Թուրքիայում տեղի ունեցած երկրաշարժի կապակցությամբ այդ երկրին օգնություն տրամադրելու Հայաստանի իշխանության առաջարկներին, հարցազրուցավարի հետ միասին հիշեց, որ 1988 թվականին Սպիտակի երկրաշարժի ժամանակ երկաթուղիով հարեւան երկրների տարածքով Հայաստան եկող օգնությունը թալանվում էր, որ գնացքները քարկոծվում էին եւ երկրաշարժի առիթով մեր հարեւանները շնորհավորական նամակներ էին ուղարկում հայ ժողովրդին: Անդրադառնալով նաեւ լրահոսում արդեն տեղ գտած տեղեկությանը, թե երկրաշարժից հետո Թուրքիայում նաեւ թալան է սկսվել՝ տիկին Մելիքյանը հիշեց նույն Սպիտակի երկրաշարժի ժամանակվա մեր թալանչիներչին, որոնք նրա խոսքով մեծ հարստություն դիզեցին, իսկ այսօր դարձել են նոր Հայաստանի առաջամարտիկներ:
Հայաստանում ստեղծված ընդհանուր իրավիճակի, լայն իմաստով ընդդիմության եւ հանրության պահվածքի մասին տիկին Մելիքյանը ասաց, որ քանի դեռ չեն հասկացել, որ թշնամու շահերը սպասարկող իշխանության նկատմամբ համարժեք վարքագիծ չկա, կորուստները շարունակվելու են: «Չեմ ուզում ոչ մեկի վիրավորել, բայց կանանց մասնատեցի՞ն, մեր զինվորներին ուղիղ եթերով գնդակահարեցի՞ն, 15 զինվորներին ողջ-ողջ վառեցի՞ն, Սուրմալուն պայթեցրի՞ն, խաղողագործներն իրենց բերքը թափեցի՞ն, բեռնափոխադրողները Լարսում բոմժերի նման մնացի՞ն, Հայաստանի տարածքից հանձնեցի՞ն թշնամուն, Արցախը այսօր շրջափակման մե՞ջ է: Էլ ո՞րն ասենք: Այդ ամենն ո՞վ է հանդուրժում: Հայ ժողովուրդը: Եվ այս ամենի արդյունքը սա է»,-ասաց զոհված զինվորի մայրը:
Աշոտ ՀԱԿՈԲՅԱՆ
