Ինչպես հայտնել էինք, ԱԺ 8-րդ գումարման 5-րդ նստաշրջանի հերթական նիստում այսօր քննարկվում է ԱԺ «Հայաստան» խմբակցության պատգամավոր, ՀՀ պաշտպանության նախկին նախարար Սեյրան Օհանյանի նկատմամբ հանրային քրեական հետապնդում հարուցելուն համաձայնություն տալու մասին ՀՀ գլխավոր դատախազի միջնորդագիրը։ Ըստ ԱԱԾ-ի ձեռքբերած տվյալների՝ պաշտպանության նախարար եղած ժամանակ Սեյրան Օհանյանը կատարել է առանձնապես խոշոր չափերով վատնում, ինչպես նաեւ անձնական այլ շահագրգռվածությունից եւ խմբային շահերից ելնելով՝ իր պաշտոնեական դիրքն օգտագործել է ծառայության շահերին հակառակ․ մասնավորապես, հողային օրենսգրքի խախտմամբ երկու զորամասերի՝ «Երասխ 1»-ի եւ «Երասխ 2»-ի տարածքները, որոնք ՊՆ-ի սեփականությունն են հանդիսացել, օտարվել են եւ անհամեմատ էժան գնով վաճառվել, իսկ X զորամասի հրամանատար Գրիգորի Խաչատուրովը դրանցից մեկը գրավադրել է բանկում եւ ստացել գումար․ խեղաթյուրվել է նշյալ գույքի իրական պատկանելիությունը։
Այս միջնորդության քննարկումից հետո հերթը երկրորդինն էր, եւ գլխավոր դատախազ Աննա Վարդապետյանը խնդրեց այն քննարկել դռնփակ ռեժիմով․ «Օրենքով պաշտպանվող գաղտնիք է պարունակում երկրորդ միջնորդագիրը»։ ԱԺ նախագահ Ալեն Սիմոնյանի ցուցմամբ հեռարձակումը դադարեցվեց, լրագրողներին խնդրանք հղվեց դահլիճից եւ օթյակներից դուրս գալու։ «ՔՊ-ից երկու պատգամավոր ունենք, որոնք դեռ չեն ստացել գաղտնիության թույլտվություն, ուստի խնդրում եմ լքել դահլիճը»,-նշեց Ալեն Սիմոնյանը։
Հավելենք, որ Սեյրան Օհանյանն առաջին միջնորդագրի ներկայացման ժամանակ ելույթ ունենալու իրավունք ուներ, սակայն դահլիճում չէր։ Նա իրավունք ունի նաեւ փակ մասին մասնակցելու։
Լուիզա ՍՈՒՔԻԱՍՅԱՆ
