«Պատկերացնո՞ւմ եք ինչ ոռնոց կբարձրացնեին այսօր, եթե պարզվեր, որ ՀՀ-ում մի զորամաս է փակվում կամ վաճառվում։ 2010-ական թվականներին նման ոռնոց չկար, որովհետեւ այս ամենը միայնակ չի արվել, տարբեր շրջանակներ տարբեր «փայ» են ունեցել։ Հետո էլ սոցցանցերում տնակի նկար են գցում եւ գրում, թե ինչու է զինվորը տնակում կամ վրանում քնում։ Տնակի մեջ է, որովհետեւ զորանոցը ծախել եք, կերել եք․․․», – ԱԺ նիստում այսօր հայտարարեց ՔՊ խմբակցության պատգամավոր Գեւորգ Պապոյանը։
Հիշեցնենք, որ ԱԺ 8-րդ գումարման 5-րդ նստաշրջանի հերթական նիստում այսօր քննարկվում է ԱԺ «Հայաստան» խմբակցության պատգամավոր, ՀՀ պաշտպանության նախկին նախարար Սեյրան Օհանյանի նկատմամբ հանրային քրեական հետապնդում հարուցելուն համաձայնություն տալու մասին ՀՀ գլխավոր դատախազի միջնորդագիրը։ Ըստ ԱԱԾ-ի ձեռքբերած տվյալների՝ պաշտպանության նախարար եղած ժամանակ Սեյրան Օհանյանը կատարել է առանձնապես խոշոր չափերով վատնում, ինչպես նաեւ անձնական այլ շահագրգռվածությունից եւ խմբային շահերից ելնելով՝ իր պաշտոնեական դիրքն օգտագործել է ծառայության շահերին հակառակ․ մասնավորապես, հողային օրենսգրքի խախտմամբ երկու զորամասերի՝ «Երասխ 1»-ի եւ «Երասխ 2»-ի տարածքները, որոնք ՊՆ-ի սեփականությունն են հանդիսացել, օտարվել են եւ անհամեմատ էժան գնով վաճառվել, իսկ X զորամասի հրամանատար Գրիգորի Խաչատուրովը դրանցից մեկը գրավադրել է բանկում եւ ստացել գումար․ խեղաթյուրվել է նշյալ գույքի իրական պատկանելիությունը։
Գեւորգ Պապոյանը շարունակեց․ «Եթե չուտեիք, այսպես չէր լինի։ Ինձ այս հարցի մենակ բարոյական կողմն է հետաքրքրում, ուրիշ ոչ մի բան։ Թքած են ունեցել պետության եւ օրենքի վրա։ Պետականության ոչնչացումն այսպես է տեղի ունենում: Խոսում էին՝ բանակը, բանակը, ամենամարտունակ բանակը։ Սենց են պահե՞լ ամենամարտունակ բանակը։ Այդ մարդիկ չեն պատկերացրել, որ գալու է պատասխան տալու ժամանակը։ Վստահ եմ, որ նման հարյուրավոր գործեր կլինեն բոլոր նախարարություններում։ Սա «մեր դեմ խաղ չկա»-ի հետեւանքն է»։
Հ․Գ․ Հիշեցնենք, որ Նիկոլ Փաշինյանի ղեկավարած կառավարությունը որոշել է վաճառել ՀՀ պաշտպանության նախարարությանն ամրակցված 71 անուն անշարժ գույք։ Իսկ Գեւորգ Պապոյանին նախկինում ՀՀԿ-ի անդամ լինելու մասին հիշեցնելու առիթ եղել է ԱԺ նախորդ նստաշրջաններից մեկում։
Կարդացեք նաև
Լուիզա ՍՈՒՔԻԱՍՅԱՆ
