Ապահովել դեպի Հայաստան ներգաղթ, կասեցնել արտագաղթը՝ ստեղծելով անվտանգային ավելի ապահով միջավայր եւ սոցիալական ավելի լավ պայմաններ. այսպիսի եզրահանգման են եկել «Ապագա հայկականը» քաղաքացիական ասամբլեայի «Բնակչության աճ» փորձագիտական հանձնախմբի անդամները:
Հիշեցնենք, մարտին Երեւանում կկայանա «Ապագա հայկականը» քաղաքացիական համաժողովը: Նախաձեռնության նպատակն է՝ ի մի բերել հանրության ջանքերը՝ հայրենիքում եւ սփյուռքում, ձեւավորելու միասնական տեսլական՝ ապագայի համար եւ այդ տեսլականին հասնելու ուղղություններն ուրվագծել: Առաջին համահայկական քաղաքացիական համաժողովի փորձագիտական երեք հանձնախմբերի միացյալ եւ վերջին հանդիպումը կայացավ այսօր:
«Ապագա հայկականը» քաղաքացիական ասամբլեայի «Բնակչության աճ» փորձագիտական հանձնախմբի ղեկավար Արմինե Հովհաննիսյանն Aravot.am-ի հետ զրույցում նկատեց, որ մարդիկ Հայաստանից հիմնականում արտագաղթում են, քանի որ անվտանգ եւ սոցիալապես ապահով չեն իրենց զգում այստեղ, բայց մենք պետք է կարողանանք ստեղծել այնպիսի պետություն, որի բնակիչն ու քաղաքացին իրենց տեր զգան, իրենց ապագայի կերտողը. «Ոչ ոք դրսից չի գալու եւ որոշի՝ իր երեխան այստեղ ունի՞ ապրելու իրավունք, թե՝ ոչ»:
Հանձնախմբի քննարկման թեմաներից է եղել նաեւ երիտասարդ կանանց մայրանալու հնարավորությունները՝ առանց ամուսին ունենալու:
Կարդացեք նաև
«Դա մեր երկրի համար մի քիչ խորթ է թվում, նույնիսկ անձնապես, քանի որ ես հինգ երեխաների մայր եմ եւ ամուսին ունեմ, բայց ժամանակներն ու հարցերն այնքան կարեւոր են այսօր, որ մենք պետք է կարողանանք ապահովել բնակչության աճ՝ նաեւ այդ առումով եւ որպես հանրություն, պետք է խրախուսենք, որ երիտասարդ աղջիկները մայր դառնան ու հպարտ մայր դառնան»,- ասաց Արմինե Հովհաննիսյանը:
Այլ մանրամասները՝ տեսանյութում
Նելլի ԳՐԻԳՈՐՅԱՆ
