«Ինչո՞ւ Լաչինի միջանցքը չփակվեց 8-9 ամիս առաջ։ Որովհետեւ 8-9 ամիս առաջ չէր վերախմբագրվել 2020թ․-ի նոյեմբերի 9-ի փաստաթուղթը։ Դրանում Արցախի հանրապետության վերջնական կարգավիճակի մասին որեւէ նշում չկա, բայց 2022թ․-ի սեպտեմբերին եւ հոկտեմբերին Վաշինգթոնում եւ Պրահայում ՀՀ իշխանության բանակցած փաստաթղթերով պաշտոնական Երեւանն ընդունել է Ադրբեջանի սուվերենությունն Արցախի հանդեպ»,-խորհրդարանական ընդդիմության հրավիրած՝ Ադրբեջանի կողմից Լաչինի միջանցքի փակման թեմայով խորհրդարանական լսումների ժամանակ այսօր հայտարարեց քաղաքագետ Բենիամին Մաթեւոսյանը։
«Եթե ընդունում ես, որ Արցախի հանրապետությունն Ադրբեջանի սուվերեն տարածքի մասն է, նշանակում է, որ Արցախի հանքերն էլ են Ադրբեջանինը, Լաչինի միջանցքի վերահսկողությունը՝ նույնպես»,-հավելեց Բենիամին Մաթեւոսյանը։
Լուիզա ՍՈՒՔԻԱՍՅԱՆ
