«Ձերբակալված եւ կալանավորված անձանց պահելու մասին օրենքում փոփոխությունների համաձայն՝ կբարելավվեն ձերբակալված եւ կալանավորված անձանց պահման վայրերի պայմանները։ ԱԺ պաշտպանության եւ անվտանգության հարցերի հանձնաժողովի նիստում այսօր ներկայացնելով նախագիծը՝ Ներքին գործերի նախարարի տեղակալ Արփինե Սարգսյանը նշեց․ «Առաջարկվում է կառավարության որոշմամբ սահմանել ձերբակալվածների եւ կալանավորվածների պահելու վայրերի շինության, կահավորման առանձնահատկությունները, որոնք անմիջական կապված են ձերբակալված անձանց իրավունքների երաշխավորման եւ պետության պոզիտիվ պարտավորությունների կատարման հետ։ ՀՀ-ում առկա 33 ձերբակալվածների պահման վայրերն այս պահին մենք հավաքագրում ենք, որպեսզի հասկանանք, թե ինչ շենքային խնդիրներ կան, ինչ միջազգային չափանիշներ պետք է լինեն։ Փոփոխություններ կարվեն՝ ձերբակալվածների իրավունքներն ապահովելու համար»։
«Հայաստան» խմբակցության պատգամավոր Գեղամ Մանուկյանը դիմեց Արփինե Սարգսյանին․ «Դիմադրության շարժման հազարավոր անդամներ շատ լավ են տեսել ձերբակալվածների պահման վայրերի պայմանները։ Կարող եք դիմել շարժման ղեկավարությանը, ձեզ շատ տեղեկություններ կան։ Բարվոք վիճակում է Երեւանի պահման վայրը։ Մեր հազարավոր հայրենակիցներ շատ լավ տեղյակ են այդ խնդիրներից»։
Նախագիծն առաջիկայում քննարկվելու է ԱԺ լիագումար նիստում։
Լուիզա ՍՈՒՔԻԱՍՅԱՆ
