ՀՀ վարչական դատարանում այսօր (դատավոր Մհեր Պետրոսյան) ՆԳՆ ոստիկանության ներկայացրած՝ 44-օրյա պատերազմում անմահացած զինծառայող Դավիթ Ուզունյանի հորը՝ Բագրատ Ուզունյանին վարչական պատասխանատվության ենթարկելու մասին հայցի քննությունն էր։ Միջադեպը, հիշեցնենք, տեղի է ունեցել 2022թ․ սեպտեմբերի 21-ին, երբ Եռաբլուրում վարչապետ Նիկոլ Փաշինյանի մուտքն ապահովելու համար ոստիկանները բռնի, քարշ տալով եւ մարմնական վնասվածքներ հասցնելով բերման էին ենթարկել մոտ 4 տասնյակ ծնողների։ Հայցվոր կողմը՝ ոստիկանությունը, չէր ներկայացրել այսօրվա նիստին, թեեւ, ինչպես դատական նիստերի քարտուղարը նշեց, պատշաճ կարգով ծանուցվել էր նիստի օրվա եւ ժամի մասին։
Ոստիկանությունը 21.11.2022թ․-ին հայցադիմում է ներկայացրել ընդդեմ Բագրատ Ուզունյանի` վարչական իրավախախտումների վերաբերյալ ՀՀ օրենսգրքի 182-րդ հոդվածի հիմքով վարչական պատասխանատվության ենթարկելու պահանջի մասին: Այդ հոդվածը վերաբերում է ոստիկանության ծառայողի օրինական պահանջը չկատարելուն եւ ենթադրում է տուգանքի նշանակում` նվազագույն աշխատավարձի 50-ապատիկի չափով։
Դատավոր Մհեր Պետրոսյանը լրագրողների կողմից նիստի տեսանկարահանման առնչությամբ կարծիք հարցրեց պատասխանող կողմից։ Վարչական գործերով ծնողների շահերի ներկայացուցիչ, փաստաբան Ներսես Հարությունյանը պնդեց՝ կարեւոր է այս հայցի լուսաբանումը, քանի որ գործն առանձնահատկություն ունի եւ վերաբերում է զոհված զինծառայողի ծնողին, որին ոստիկանները բռնի ուժով որդու շիրիմից տարել էին ոստիկանություն։
Ներսես Հարությունյանը նաեւ կարծիք հայտնեց, որ հայցվորի բացակայությունը խոչընդոտ չէ նիստը հետաձգելու համար, իսկ հայցի դեմ ամբողջությամբ առարկում են, որովհետեւ ոստիկանության գործողություններն իրավաչափ չեն եղել։
Կարդացեք նաև
Մանրամասն՝ առաջիկայում։
Լուիզա ՍՈՒՔԻԱՍՅԱՆ
