Քիչ առաջ ՀՀ տարածքային կառավարման և ենթակառուցվածքների նախարար Գնել Սանոսյանը Շիրակի մարզի պաշտոնյաներին՝ ուժային կառույցների ղեկավարներին, համայնքապետերին, Շիրակի մարզպետարանի աշխատակազմին, ինչպես նաև ԱԺ Շիրակի մարզից ընտրված ՔՊ-ական պատգամավորներին ներկայացրեց նորանշանակ մարզպետ Մուշեղ Մուրադյանին։
Նախարարը շնորհակալություն հայտնեց Նազելի Բաղդասարյանին՝ գովաբանելով նրան։ Գնել Սանոսյանը նշեց, որ Նազելի Բաղդասարյանի հետ սերտ են աշխատել, նա մարզում եղած հիմնախնդիրներին բավական արագ է տիրապետել և բավական արագ էլ լուծում է տվել կամ լուծումը նախաձեռնել։
Նազելի Բաղդասարյանն իր հերթին շնորհակալություն հայտնեց՝ թվարկելով այն կարևոր աշխատանքները, որոնք մեկ տարվա ընթացքում կատարվել են մարզում։
Նազելի Բաղդասարյանը շեշտեց, որ մարզպետը պիտի լինի արդարամիտ։ «Յուրաքանչյուր մարզպետ ունի իր ձեռագիրը, իր մոտեցումները, իր առջև դրված խնդիրները, մարզպետը կարող է լինել պահանջկոտ, խիստ, սկզբունքային, հետևողական, բայց կարծում եմ ամենակարևորը՝ մարզպետը պիտի լինի արդարամիտ», -ասաց Նազելի Բաղդասարյանը։
Նոր մարզպետին էլ ներկայացնելիս՝ նախարարն ասաց, որ Մուշեղ Մուրադյանը տարբեր ոլորտներում է աշխատել, այդ թվում՝ Շիրակի մարզպետարանում և հավելյալ ժամանակ նրանից չի պահանջվի մարզային խնդիրներին ծանոթանալու համար։
«Շիրակի մարզում բազմաթիվ խնդիրներ կան, բայց նաև ի ուրախություն բոլորիս՝ Շիրակի մարզում նաև հսկայածավալ ծրագրեր կան, բայց այդ ծրագրերը պիտի համատեղ կյանքի կոչենք, ինչքան համախմբված, ինչքան միասին աշխատենք, այնքան դրանք արագ կիրագործենք՝ ի շահ մարզի»,-ասաց նախարարը։
Կարդացեք նաև
Շիրակի նորանշանակ մարզպետ Մուշեղ Մուրադյանն էլ իր խոսքում նշեց, որ իր համար մեծ պատիվ է բարձր վստահությանն արժանանալու, մարզպետի պաշտոնում նշանակվելու համար։
«Լիահույս եմ, որ կառավարության հետ համատեղ իմ բոլոր ջանքերը, հնարավորությունները կներդնեմ, որպեսզի համատեղ աշխատանքի արդյունքում մեր մարզի առջև ծառացած խնդիրները նպաստավոր լուծում ստանան։
Միևնույն ժամանակ, կրկնում եմ, տեղական ինքնակառավարման մարմինների, պետական կառավարման մարմիների, տարածքային կառավարման բոլոր կառույցների հետ համատեղ աշխատանքով մենք տեսանելի արդյունքի կհասնենք։
Գիտակցում եմ այս բարձր վստահության պատասխանատվությունը և մեծ պատրաստակամությամբ ու նվիրումով կանցնեմ աշխատանքի։ Անելիքները շատ են, խնդիրները շատ են, բայց կա նաև կամք»,- ասաց Մուշեղ Մուրադյանը։
Նախարար Գնել Սանոսյանը մարզպետարանի աշխատակազմին հիշեցրեց, որ կառուցվածքային փոփոխություններ են տեղի ունենալու։ Իսկ որպես լավ լուր՝ հայտնեց Կապսի ջրամբարի շինարարությունը մեկնարկելու ու Ջրաձոր գյուղը դիմացի սարահարթ տեղափոխելու մասին։
Երկրորդ լավ լուրը, ըստ նախարարի, այն է, որ Հյուսիս-Հարավ ճանապարհը մինչև Գյումրի հասնելը, պետք է Գյումրին շրջանցի և հասնի Բավրա։
Գնել Սանոսյանը տեղեկացրեց, որ վարչապետի հետ խորհրդակցել են մինչև Գյումրի երկկողմանի լայն ճանապարհ կկառուցելու մասին։
Շիրակի նորանշանակ մարզպետը վարդերի փունջ նվիրեց Նազելի Բաղդասարյանին՝ ծափողջյունների տակ ճանապարհելով նրան։
Նունե ԱՐԵՎՇԱՏՅԱՆ
