«Մենք պետք է հասնենք այն իրավիճակին, երբ Հայաստանն ու Ադրբեջանն այսքան շատ ժամանակ չխլեն վեհաժողովից՝ վիճելով փաստերի շուրջ»,-Aravot.am-ի հետ զրույցում ի պատասխան մեր տարատեսակ հարցադրումների, թե ինչո՞ւ Ադրբեջանը մինչև այժմ չի կրել պատասխանատվություն Արցախի դեմ ֆոսֆորային զենք կիրառելու համար և ինչո՞ւ այդ մասին արձանագրումներ չկան իր զեկույցում, այսպես արձագանքեց ԵԽԽՎ բրիտանացի պատվիրակ Ջոն Հովելը։
Նա Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում ներկայացրեց «Զինված հակամարտությունների շրջակա միջավայրի վրա ազդեցությունը» թեմայով զեկույց։
Մեր այն հարցին՝ ինչպե՞ս եք պատկերացնում Հարավայի Կովկասում լարվածության նվազեցումը, բրիտանացի պատվիրակը պատասխանեց․ «Առաջին բանը, որ ուզում եմ ասել՝ լարվածության նվազեցումն է ՀՀ-ում և Ադրբեջանում։ Երկու երկրներին ես լավ գիտեմ երկար տարիներ։ Եվ ամենավատն այն է, որ այս վեճը նրանց միջև դեռ շարունակվում է։ Ուստի ես կոչ եմ անում այս ճգնաժամի, լարվածության հրատապ դադարեցում, որպեսզի երկու կողմերը նստեն և միասին անկեղծորեն աշխատեն։ Իմ կարծիքով՝ որքան հնարավոր է հրատապ կերպով պետք է հասնել լարվածության դադարեցման։ Պետք է հասնենք այն իրավիճակին, երբ Հայաստանն ու Ադրբեջանն այսքան շատ ժամանակ չեն խլի Վեհաժողովից, որպեսզի վիճեն փաստերի շուրջ»։
Մեր հարցին՝ ինչո՞ւ մինչև այժմ Ադրբեջանը պատասխանատվության չի ենթարկվել ֆոսֆորային զենքի կիրառման համար, Ջոն Հովելը խուսափեց պատասխանել։
Կարդացեք նաև
Մեր հիշեցմանը՝ Գերմանիայի ԱԳ նախարարը հայտարարեց, որ եվրոպական դիտորդական առաքելությունը իմաստ կունենա, եթե Ադրբեջանի կողմից ևս հասանելիություն լինի, մինչդեռ Ադրբեջանը մերժում է, հետևաբար ինչպե՞ս է այս իրավիճակում պատկերացնում հարցի լուծումը, Ջոն Հովելը պատասխանեց․ «Ես գերմանացի չեմ, Մեծ Բրիտանիան այլևս Եվրոպական միության մաս չի կազմում։ Այնպես որ, իմ մոտեցումն այն է, որ հրատապ պետք է դադարեցնել լարվածությունը և շարժվել առաջ»։ Հետաքրքրվեցինք՝ իր զեկույցում ինչո՞ւ առանձին չի անդրադարձել Ադրբեջանի ագրեսիային՝ ընդդեմ ՀՀ-ի և ԼՂ-ի, ինչո՞ւ արձանագրում չկա այն մասին, որ Ադրբեջանը ֆոսֆորային զենք է կիրառել և չի պատժվել, Ջոն Հովելը ոչ մի կերպ չցանկացավ այս հարցերին պատասխանել և նորից շեշտեց՝ իր մոտեցումն է՝ լարվածության հրատապ դադարեցում։
Տաթև ՀԱՐՈՒԹՅՈՒՆՅԱՆ
