«Բուսական աշխարհի մասին» օրենքում փոփոխությունների նախագծով առաջարկվում է ոլորտի լիազորող նորմեր սահմանել. որոշ իրավական ակտեր կհամապատասխանեցվեն սահմանադրության պահանջներին։ Այսօր ԱԺ տարածքային կառավարման, տեղական ինքնակառավարման, գյուղատնտեսության եւ շրջակա միջավայրի պահպանության հարցերի մշտական հանձնաժողովի նիստում հարցի զեկուցող՝ ՀՀ շրջակա միջավայրի նախարարի տեղակալ Արամ Մեյմարյանից ՔՊ խմբակցության պատգամավոր Սերգեյ Բագրատյանը ոլորտին վերաբերող մի խնդրի մասին հարցրեց։
«Այդ լիազորող նորմերը կարտացոլե՞ն այն հանգամանքը, որ բուսական աշխարհի հետ կապված որոշակի տնտեսվարողներ գործունեություն են ծավալում ուրցի, դաղձի, մասուրի հավաքմամբ։ Այս դաշտը կանոնակարգվելո՞ւ է։ Հիմա չկա որեւէ օրենք, որը կանոնակարգում է ոլորտը։ Պետք չէ՞ այս գործունեությունը հարկել։ Սա կարեւոր հարց է,-հարցրեց Սերգեյ Բագրատյանը։
Փոխնախարարը պատասխանեց, որ օրենքը թույլ է տալու կենդանական եւ բուսական աշխարհի կադաստրային տվյալները տրամադրել ՀԿ-ներին կամ դիմողներին․ «Ձեր ասած խնդիրը կարեւոր է եւ ուշադրության կենտրոնում է։ Հենց այսօր առավոտ քննարկում ենք ունեցել։ Վարչության ղեկավարը հավաստիացրել է, որ մշակումներն ընթացքում են, շուտով կարգավորող ակտ կունենանք»։
Սերգեյ Բագրատյանը հավելեց՝ շատ քաղաքացիներ են դիմում անհանգստանալով, որ հնարավոր է ժամանակի ընթացքում լինեն հարկեր, որոնցից իրենք, փաստորեն, խուսափել են։ Արամ Մեյմարյանն արձագանքեց, որ գործընթացը փոքր-ինչ երկար կտեւի, որովհետեւ վերաբերելու է բուսական աշխարհի հաշվառմանը․ «Այս տարի ընդհանուր հաշվառում կլինի»։
Կարդացեք նաև
Լուիզա ՍՈՒՔԻԱՍՅԱՆ
