«Մենք բոլորս համակարծիք ենք, որ Լաչինի միջանցքը պետք է բացվի»,-Aravot.am-ի հարցին՝ արդյոք ձեզ համար ադրբեջանական կողմի հայտարարությունները արդարացվա՞ծ են` հաշվի առնելով այն հանգամանքը, որ Ադրբեջանը փակել է Լաչինի միջանցքը, ինչն առաջացրել է հումանիտար ճգնաժամ Լեռնային Ղարաբաղի քաղաքացիների համար»,- այսպես պատասխանեց Ադրբեջանի հարցերով զեկուցող, նորվեգացի պատգամավոր Լիզ Քրիստոֆերսենը։
Նա հիշեցրեց, որ իրենք՝ Ադրբեջանի հարցերով զեկուցողներն ու Հայաստանի հարցերով զեկուցողները համակարծիք են և կոչ են արել, որ Լաչինի միջանցքը բացվի։
Անդրադառնալով ադրբեջանական պատվիրակության կողմից կազմակերպված միջոցառմանը, որն անցկացվեց ԵԽԽՎ լիագումար նիստերից դուրս, որտեղ նրանք ներկայացնում էին, թե Հայաստանի տեղադրած ականների պատճառով ադրբեջանցիներ են զոհվում և այլն, Ադրբեջանի հարցերով զեկուցողն ասաց․ «Այս միջոցառումն ինձ հետաքրքրեց, քանի որ ականազերծումը խիստ կարևոր է։ Այս խնդիրն ամենուր է»։
Կարդացեք նաև
Շեշտեցինք՝ Լաչինի միջանցքի շրջափակման համատեքստում նման հայտարարությունները, այնուամենայնիվ, համոզի՞չ են, քանի որ շրջափակման պատճառով նաև մարդկային կյանքի կորուստ կա, պատգամավորը պատասխանեց․ «Ես կզգուշանամ խորանալ հակամարտության մեջ։ Ես ուզում եմ փաստահավաք առաքելություն իրականացնել դեպի Ադրբեջան՝ փորձելով ավելին իմանալ։ Գիտեմ, որ Հայաստանի հարցերով համազեկուցողները նույնպես պլանավորում են փաստահավաք առաքելություն իրականացնել Հայաստան։ Մենք բոլորս համակարծիք ենք, որ Լաչինի միջանցքը պետք է բացվի, ինչը այսօր ևս կքննարկենք լիագումար նիստի ընթացքում»։
Լիզ Քրիստոֆերսենն ասաց, որ պլանավորում է մեկնել Ադրբեջան ապրիլի սկզբին, բայց դրա համար իրեն նախ հաստատում է պետք։ Նա նաև հավելեց, որ անվտանգության նկատառումներից ելնելով՝ իրենց երկրում խորհուրդ են տալիս չգնալ Ադրբեջան, բայց ԵԽԽՎ-ում աշխատանքի բերումով նա ամենայն հավանականությամբ կմեկնի Ադրբեջան։
ԵԽԽՎ պատգամավորը զգուշացավ ավելին ասել՝ նշելով, որ ավելին կասի փաստահավաք առաքելություն իրականացնելուց հետո։
Տաթև ՀԱՐՈՒԹՅՈՒՆՅԱՆ
