«Ճանաչել եմ այրված տղաներից մեկին։ Ծնողների օգնությամբ այդ շինության մեջ իրենք են ամեն ինչ արել։ Լվացքի մեքենա են գտել-բերել, խողովակ են հայթայթել, որ ջուր հասցնեն։ Իրենք են իրենց գլխի տերը եղել։ Անտերության մատնված։ Երկու տարում իշխանությունից մի ճիշտ բան լսած կա՞ք»,-քննչական կոմիտեի դիմաց այսօր լրագրողների հետ ճեպազրույցում ասաց 44-օրյա պատերազմում անմահացած Անդրեաս Անդրեասյանի հայրը՝ Տիգրան Անդրեասյանը՝ անդրադառնալով Գեղարքունիքի մարզում հրդեհ-պայթյունի հետեւանքով 15 զինվորների մահվան դեպքին։
Նա կարծիք հայտնեց, որ իշխանությունը հայամետ չէ եւ լծված է բանակը քանդելու գործին․ «Թուրքն ինչ ասում է` սրանք ամիսներ անց անում են։ Ալիեւը պարզ ասել է, որ ՀՀ-ն բանակ չպետք է ունենա։ Ու սրանք դա են անում։ Խնայողության հաշվին բանակ են քանդում։ Ծնողներն են այսօր տիրություն անում զինվորներին՝ նասկի, կոշիկ․․․շարքային զինվորը վատ վիճակում է։ Հարազատներիս տղաները ծառայում են, վատ վիճակի մասին են պատմում։ Պատերազմի ժամանակ դիրքերն ավելի բարվոք վիճակում էին։ Իմ աչքով եմ տեսել տղայիս զորամասը»։
Նկատառմանն ի պատասխան, որ ԱԺ պաշտպանության եւ անվտանգության հարցերի հանձնաժողովի նախագահ, ՔՊ-ական Անդրանիկ Քոչարյանը պնդում է, որ սահմանը մի քանի անգամ մեծացել է եւ ֆիզիկապես դժվար է, Անդրեասյանն ասաց․ «Այդ անձի անունը․․․նրա գործառույթը բանակ քանդելն է։ Հենց ինքը։ Իր ցինիկ խոսալը, ասում է՝ զինվորը լավ է։ Ո՞նց է լավ։ Ե՞րբ եք այցելել շարքային զինվորին, որ տեսնեք։ Զինվորը չորս տեղանոց վրանում է մնում»։
Կարդացեք նաև
Լուիզա ՍՈՒՔԻԱՍՅԱՆ
