Կառավարությունը 100 %-ով կփոխհատուցի Ջերմուկում 2022թ սեպտեմբերին ռազմական գործողություններից տուժած տնտեսվարողների 4 ամսվա կոմունալ ծախսերը: Նման որոշում կայացվեց այսօր ՀՀ կառավարության նիստի ընթացքում:
ՀՀ էկոնոմիկայի նախարար Վահան Քերոբյանը ներկայացնելով նախագիծը՝ նշեց, որ կառավարությունն առաջարկում է Վայոց ձորի Ջերմուկ համայնքում 2022 սեպտեմբերի 11-ի դրությամբ հյուրատնային և հյուրանոցային գործունեություն իրականացնող կազմակերպություններին, որոնց շրջանառությունը նվազել է 50 տոկոսից ավելի, փոխհատուցել սեպտեմբեր-դեկտեմբեր ամիսների էլեկտրաէներգիայի և գազի ծախսերի համագումարի 100 տոկոսը, ինչն էապես կթեթևացնի նրանց կրած վնասները, և թույլ կտա, որ ընկերությունները ծառայությունները մատուցեն ամբողջ ծավալով և առանց որակի կոմպրոմիսի գնալու:
«Ընդհանուր աջակցության չափը, մեր նախնական գնահատականներով, կկազմի մոտ 50 մլն դրամ, որը, կարծում ենք, արդեն կրած վնասների փոխհատուցման տեսանկյունից համարժեք է»,- ասաց Քերոբյանը:
Նա տեղեկացրեց, որ սեպտեմբերի 13-ի ռազմական գործողությունների հետևանքով Ջերմուկում հյուրանոցներն ու հյուրատները ընդհուպ մինչեւ երկու ամսով դադարեցրել էին իրենց գործունեությունը՝ չընդունելով զբոսաշրջիկների։
Կարդացեք նաև
«Չնայած արդեն հոկտեմբերի 2-րդ կեսից և նոյեմբերի սկզբից հյուրատների և հյուրանոցների կողմից գործունեությունը վերականգնվել էր զբոսաշրջիկների համար, Ջերմուկ համայնքը շարունակում էր մնալ ոչ գրավիչ և վտանգավոր վայր՝ հանգիստը կազմակերպելու տեսանկյունից։ Նշված գործոնների ազդեցությամբ, համաձայն Պետական եկամուտների կոմիտեի կողմից տրամադրած տեղեկատվության՝ մոտ 3 անգամ նվազել է Ջերմուկ համայնքում հյուրանոցային, հյուրատնային գործունեություն իրականացնող տնտեսավարողների իրացման շրջանառությունը»,-ասաց նախարարը:
Լուսինե ՄԱՐԳԱՐՅԱՆ
