«Բացում» քաղաքացիական նախաձեռնությունը Մաշտոցի պուրակում հանրային քննարկում էր նախաձեռնել՝ թշնամու կողմից Բերձորի միջանցքը փակ պահելու թեմայով:
Նախաձեռնության անդամների համոզմամբ, հանրային տարբեր խմբեր ու անհատներ ունեն տարբեր մոտեցումներ ու առաջարկներ, բայց դրանք պետք է ճշգտրվեն, հղկվեն եւ ընդունվեն բոլորի կողմից, որպեսզի ծառայեն նպատակին և իրականություն դառնան:Նրանց պատկերացմամբ, Հայաստանի խաղաղության եւ ժողովրդավարության, հզորացման ու զարգացման հասնելու ճանապարհը պայքարն է հանուն Արցախի հայկական մնալու իրավունքի:
«Բացում» նախաձեռնությունն առաջարկում է մի կողմ դնել քաղաքական տարաձայնությունները եւ կենտրոնանալ Բերձորի միջանցքի փակ լինելու վրա»,-ասաց նախաձեռնության անդամներից Նարեկ Այվազյանը: Հավելեց, որ այդ նպատակին ուղղված մի քանի գաղափար ունեն, որոնք դասակարգել են: Ապա թվարկեց. « Համար 1` քայլելով գնալ ու փորձել բացել Բերձորի միջանցքը: Դա կունենա տարբեր դասակարգումներ: Համար 2` հասնել նրան, որ միջազգային հանրությունը այնպիսի ճնշում գործադրի Ադրբեջանի վրա, որ ադրբեջանցիները դուրս գան, եւ համար 3` ստեղծել այնպիսի իրավիճակ, որը փակողներին կդնի փակուղու առաջ, որ նրանք ստիպված կլինեն դուրս գալ»:
Նախաձեռնության անդամներից Մհեր Կարագոզյանը հիշեցրեց, թե ինչպես է Եվրախորհրդարանը ադրբեջանական գործողությունները որակել ագրեսիվ: Կարծիք հայտնեց, որ որոշակի ճնշումների դեպքում կարող են հստակ արդյունքներ լինել. «Պետք է հասնել նրան, որ ագրեսորը պատժվի պատժամիջոցներով, օրինակ Եվրոպայի եւ Ադրբեջանի միջեւ գազի պայմանագիրը համարվի առոչինչ կամ առանձին այլ պատժամիջոցներ կիրառվեն: Ըստ իս, այդ դեպքում Ալիեւը իր գլուխը պատին կտա, որ կարողանա դիմակայել այդ ճնշումներին»:
Կարդացեք նաև
«Սա անձնական հարց չէ, ոչ էլ պաշտոնական է, սա ազգային հարց է, պետք է ամբողջ ժողովուրդը ոտքի կանգնի ու պահանջատեր լինի»,-ասաց հավաքի մասնակիցներից մեկը եւ ցանկություն հայտնեց, որ հավաքի մասնակիցների թիվն ավելի մեծ լինի: Երիտասարդները որոշեցին մի քանի խմբերի բաժանվել, քննարկել առաջարկները եւ որոշել քայլերի հաջորդականությունը:
Գոհար ՀԱԿՈԲՅԱՆ
