Ադրբեջանի արտգործնախարարությունը զարմանք և ափսոսանք է հայտնել ՄԱԿ-ի Բնակչության հիմնադրամի (UNFPA)՝ Լաչինի միջանցքի շուրջ հայտարարության կապակցությամբ՝ կոչ անելով կազմակերպությանը զերծ մնալ «այնպիսի գործողություններից և հայտարարություններից, որոնք կարող են հարված հասցնել իր հեղինակությանը»:
«Կոչ ենք անում ՄԱԿ-ի Բնակչության հիմնադրամին պահպանել անաչառությունը, զերծ մնալ այնպիսի գործողություններից ու հայտարարություններից, որոնք կարող են հարված հասցնել կազմակերպության հեղինակությանը»,- ասվում է ԱԳՆ հաղորդագրության մեջ:
Ադրբեջանի ԱԳՆ-ում կարծում են, որ UNFPA հունվարի 24-ի հայտարարությունը Լաչինի միջանցքի շուրջ ոչ օբյեկտիվ է, չի համապատասխանում իրականությանը և դուրս է գալիս կազմակերպության մանդատի շրջանակից:
Ավելի վաղ հայտնի էր դարձել, որ UNFPA ադրբեջանական գրասենյակի ղեկավարին կանչել են Ադրբեջանի նախագահի աշխատակազմ և մտահոգություն հայտնել «կանխակալ, իրականությանը չհամապատասխանող» հայտարարության համար:
Կարդացեք նաև
Հայտարարության համաձայն՝ «ՄԱԿ-ի Բնակչության հիմնադրամը երկրորդում է ՄԱԿ-ի Գլխավոր քարտուղարի կոչը՝ թուլացնելու լարվածությունը և ապահովելու Լաչինի միջանցքով տեղաշարժի ազատությունն ու անվտանգությունը, նախկինում ձեռք բերված պայմանավորվածությունների համաձայն։
Սա չափազանց կարևոր է ազդակիր բնակչության՝ ներառյալ կանանց և աղջիկների, երիտասարդների, հաշմանդամություն ունեցող անձանց և տարեցների հիմնական կարիքների բավարարումն ապահովելու համար:
Միջանցքի երկայնքով տեղաշարժի ազատությունն ու անվտանգությունը կենսական նշանակություն ունեն սեռական և վերարտադրողական առողջության կարևոր պարագաների և ծառայությունների շարունակական հասանելիության և կանանց համար անվտանգ ծնունդ տալու հնարավորության համար:
ՄԱԿ-ի Բնակչության հիմնադրամը պատրաստ է աշխատել բոլոր կողմերի հետ՝ մարդասիրական սկզբունքներին համապատասխան՝ ապահովելու հիմնական պարագաների և ծառայությունների հասանելիությունը կանանց և աղջիկների, ինչպես նաև այլ խոցելի խմբերի համար»։
Պատրաստեց Վիկտորյա ԱՆԴՐԵԱՍՅԱՆԸ
