«Եվրոպան մեծ ռիսկի է դիմում՝ խստացնելով Ռուսաստանի նավթի դեմ պատժամիջոցները։ Ռուսական դիզելային վառելիքի մատակարարման վրա դրված սահմանափակումները կարող են հարվածել եվրոպական երկրների տնտեսությանը։ Եթե ԵՄ-ն չկարողանա վառելիքի այլընտրանքային միջոցներ գտնել, ապա պատժամիջոցները կհանգեցնեն հսկայական ծախսերի այնպիսի ոլորտներում, որոնք կախված են դիզելից, ինչպես օրինակ՝ գյուղատնտեսությունը եւ ավտոմոբիլային փոխադրումները»,-հունվարի 21-ին հրապարակված հոդվածում գրում է Bloomberg» ամերիկյան լրատվական գործակալությունը։
Հոդվածագիրը շեշտում է, որ Ռուսաստանը շարունակում է հանդիսանալ դիզվառելիքի խոշորագույն մատակարարը ԵՄ-ին․ «Միայն 2022թ․-ին ռուսական նավահանգիստներից բեռնաթափվել է ավելի քան 220 միլիոն բարել նավթամթերք․ սա բավական է, որպեսզի լցվեն 14 000 օլիմպիական լողավազաններ։ Եվրոպայի երկրները Ռուսաստանից գնում են նշանակալի քանակության նավթամթերք, մասնավորապես՝ դիզվառելիք։ Միայն դեկտեմբերին գնումները եղել են ռեկորդային քանակի, իսկ Ռուսաստանին բաժին է հասել այդ քանակի մատակարարման գրեթե կեսը։ ԵՄ-ի՝ Ռուսաստանից նավթամթերքի ներկրման էմբարգոն ուժի մեջ է մտնելու փետրվարի 5-ից»։
«Bloomberg»-ը հիշեցնում է, որ Ուկրաինայում Ռուսաստանի ռազմական օպերացիայի մեկնարկից ի վեր Եվրոպայի երկրները խստացրին Ռուսաստանի դեմ պատժամիջոցները, ինչը ԱՄՆ-ում եւ Եվրոպայում հանգեցրեց վառելիքի գնաճի եւ ռեկորդային ինֆլյացիայի։
Կարդացեք նաև
Պատրաստեց Լուիզա ՍՈՒՔԻԱՍՅԱՆԸ
